Лидерот на македонската партија, Македонска алијанса за европска интеграција (МАЕИ) и кандидадат за пратеник, Васил Стерјовски, гостувајќи во емисијата „Конак“ на СОТ7 телевизија, на прашањето дали чувствува загриженост во однос на континуираниот притисок на Бугарите во насока на асимилација на Македонците во Албанија, дава потврден одговор.

– Да, загрижен сум. Видете. Ние навистина сме под постојан притисок за асимилација, и сега во овој момент, и тоа постојано од 2017 година, кога беше признато едно непостоечко бугарско малцинство под бугарски притисок, што беше одобрено од парламентот, но, под закана од бугарско вето. Тоа го потврдува со фактот дека во моментот кога албанското  Министерството за надворешни работи го поднело предлог-законот за заштита на националните малцинства, предложило признавање на осум малцинства без бугарското, но „откако Бугарија отворено се закани со вето, тогаш власта и опозицијата ги здружија гласовите и со еден амандман ги додадоа и Бугарите. Од тој момент ние сме под постојан притисок за асимилација на македонската заедница, и навистина државата Македонија била индиферентна. Ние секако заштитата ја бараме од државата во која живееме а тоа е Албанија, но во моментот кога Албанија го гледа повисокиот интерес – членството во ЕУ и не сака да биде попречена, отколку неправдите што ни се прават на нас, ние, секако дека очекуваме внимание и од македонската влада за да останеме на нашите огништа како Македонци – рече Стерјовски.

Токму поради ова, додаде, пред два месеца нашата партија, МАЕИ ги покани македонските парламентарни партии во Корча.

– Македонија мора сериозно да ја сфати работата со македонската заедница во Албанија. Не да остане рамнодушна. Треба да направи стратегија, заедно со албанската влада и со конкретни вложувања, и со конкретни проекти, за да помогне овие луѓе да не заминуваат од своите краишта и да го сочуваат својот јазик, култура и традиција. Доколку немаме долгорочна стратегија од ваков вид,  ние сме на пат да исчезнеме во Албанија, затоа што овој празен простор го пополнува Бугарија, со сите тие донации, со сите тие активности што ги прави. Затоа и ги прави – констатира тој.

Одговара  и на прашањето „Зошто Македонците и се потребни на на Бугарија?

– Затоа што ние живееме долж албанско-македонската граница, и борбата Бугарија ја води со Македонија, со македонскиот народ. Со ова што сака да создаде „Бугари“ на границите со Македонија, таа сака да покаже дека Македонија од сите страни е опкружена со Бугари и не може да постои во средина македонски народ. Затоа се сите овие обиди да нè асимилираат во Албанија – нагласува Стерјовски.

Поради тоа, вели тој, бараме „уште поголемо внимание од страна на македонската влада, заедно со албанската, нормално во рамки на соработката, за да им помогнат на овие жители тука да им се подобрат условите за живот, да не си заминуваат, туку да останат и да го развиваат и зачуваат својот македонски идентитет“.

Наришкин со остри предупредувања: Русија и Белорусија подготвени за превентивни мерки

Додека војната во Украина влегува во четвртата година, тензиите меѓу Русија и Западот дополнително се вжештуваат. Директорот на руската надворешна разузнавачка служба, Сергеј Наришкин, изјави дека безбедносните структури на Русија и Белорусија се подготвени за превентивно делување во случај на понатамошна ескалација на конфликтот.

„Гледаме дека Франција, Велика Британија и Германија активно го подгреваат конфликтот. Подготвени сме да реагираме превентивно“, рече Наришкин, пренесуваат ТАСС и РИА Новости.

Тој упати остро предупредување дека евентуален напад врз Русија или Белорусија ќе предизвика директен одговор кон целиот НАТО сојуз, со посебен фокус на Полска и балтичките држави. Според него, овие земји „ќе бидат првите што ќе ја почувствуваат цената на агресивната политика“.

Наришкин ги повтори позициите на Москва — демилитаризација и „денацификација“ на Украина, како и признавање на територијалната „реалност“, односно анексираните украински региони.

Тој ја обвини Киевската власт за продолжување на конфликтот со цел да го зачува режимот на Зеленски и да избегне одговорност за, како што рече, „криминалните одлуки“.

Во контекст на регионалната безбедност, Наришкин посочи дека милитаризацијата на границата со Русија и Белорусија, особено од страна на Полска, дополнително ја дестабилизира ситуацијата. И балтичките држави беа посочени како ризични фактори во очите на Москва.

Белорусија, лојален сојузник на Русија, останува тесно вклучена во воената операција, особено по одлуката да дозволи стационирање на руско нуклеарно оружје на своја територија – потег што наиде на остри реакции од Западот.

Рускиот министер за надворешни работи Сергеј Лавров изјави дека преговорите за Украина меѓу САД и Русија се соочуваат со значителни тешкотии. Според него, договор за клучните прашања е тешко остварлив. Во интервју за рускиот весник „Комерсант“, Лавров потенцираше дека Москва нема да дозволи повторно да стане економски зависна од западните земји и дека нема намера да се повлече од четирите украински региони кои Русија ги контролира.

Преговорите за Украина: Русија инсистира на задржување на четирите региони

Шефот на руската дипломатија наведе дека за Русија е невозможно да се откаже од овие региони, потенцирајќи ги правата на населението што таму живее.

„Зборуваме за правата на луѓето кои живеат на овие територии. Затоа тие ни се драги и не можеме да се откажеме од нив и да дозволиме луѓето да бидат протерани“, истакна Лавров.

Тој ја повтори позицијата на рускиот претседател Владимир Путин од јуни 2024 година, кога побара Украина официјално да се откаже од аспирациите за членство во НАТО и да ги повлече украинските воени сили од споменатите територии.

Крим и Косово: обвинувања за двојни стандарди на Западот

Лавров спореди две ситуации поврзани со референдумите и прогласувањата независност – оние во Крим и Косово. Тој го обвини Западот за примена на двојни критериуми. Лавров потенцираше дека западните држави не го признале референдумот на Крим, додека ја поддржале независноста на Косово.

„На Крим имаше референдум, а Западот не го призна. Во Косово немаше референдум, туку еднострано прогласување независност, кое Западот го призна“, посочи Лавров.

Рускиот дипломат тврди дека независноста на Косово била објавена без демократско изјаснување, по налог на САД, од страна на претставникот на Обединетите нации, поранешниот фински претседател Марти Ахтисари. Според Лавров, на овој начин бил игнориран територијалниот интегритет на тогашна Југославија.

Лавров обвинува: „Расистички пристап кон словенските народи“

Во интервјуто, Лавров упати остри критики кон западните земји за, како што тој ги нарече, „расистички пристапи“.

„Западот смета дека Словените немаат право на самоопределување, за разлика од Албанците. Тоа се расистички позиции. Ние веќе никому ништо не му должиме и ќе се однесуваме според сопствените интереси“, додаде рускиот министер.

Русија контролира една петтина од Украина

Русија моментално контролира околу една петтина од украинската територија. Територијата ги вклучува полуостровот Крим, анектиран во 2014 година, како и делови од регионите Доњецк, Луганск, Запорожје и Херсон. Повеќето држави не го признаваат рускиот суверенитет врз овие анкетирани региони, сметајќи ги за дел од украинската територија.