Противниците на мерките против корона вирусот во Словенија се собраа во центарот на Љубљана трета среда по ред, а според извештаите на медиумите, полицијата употребила водени топови против демонстрантите.

Илјадници луѓе незадоволни од владиното управување со епидемијата се собраа пред зградата на парламентот во центарот на градот, пренесува Н1.

Протестот започна со едноминутно молчење во спомен на 20-годишна девојка која почина утрово во болница во Љубљана како последица од мозочен удар, две недели откако беше вакцинирана со Џoнсон и Џoнсон против Ковид-19.

На почетокот на собирот, на демонстрантите им се обрати и таткото на починатиот, пренесуваат словенечките медиуми.

„Мојата Катја беше вакцинирана за да ја добие својата слобода. Станува збор само за процентот на пациенти, но не беше процент, тоа беше мое дете“, рече тој и после тоа го напушти собирот.
Собрани на плоштадот во Љубљаана, се упатија кон претседателската палата, но полицијата ги спречи да се приближат до зградата.

Полицијата објави дека денешниот собир не бил пријавен, пренесува Танјуг.

Полицијата изјави дека имала неколку информативни разговори со учесниците, ги повикала да го почитуваат законот за јавни собири и ги предупредила дека просторот пред парламентот е под видео надзор.