Кисела Вода стана првата општина во Македонија што ја имплементира иновативната платформа „City and Me“ – паметна, еколошка и граѓански ориентирана апликација која има за цел да ја зајакне врската меѓу жителите и локалната самоуправа, преку дигитални алатки и награди за општествено одговорно однесување.

На официјалното лансирање, градоначалникот Орце Ѓорѓиевски порача дека ова е почеток на нова ера во локалното управување и одржливото живеење. „Со оваа апликација, секој жител кој ќе избере да пешачи, да вози велосипед, да рециклира, да пријави проблем или да учествува во анкета, ќе добие симболичен токен кој може да се искористи за локални услуги, како кафе, билет за кино или садење дрвце со свое име“, изјави Ѓорѓиевски.

„City and Me“ веќе брои над 30.000 корисници низ Балканот, а од денес и граѓаните на Кисела Вода стануваат дел од оваа инклузивна заедница. Платформата овозможува директна комуникација со општината, дигитално гласање, предлагање и пријавување проблеми – чекори кон вистинска дигитална демократија.

„Секој мал чекор може да направи голема разлика. Преку оваа платформа, ги охрабруваме граѓаните да станат Зелени херои – да бидат двигатели на позитивни промени“, рече градоначалникот, нагласувајќи ја важноста од заедничко делување на институциите, бизнисите и граѓаните.

Во рамки на настанот, беше потпишана и Декларацијата за зелени промени, со која Кисела Вода се обврзува на проактивна еколошка политика и отворена соработка со сите чинители во заедницата.

Партнери во проектот се тимот на „City and Me“ и организацијата Startup Macedonia, која повеќе години работи на развој на младински иновации и претприемништво. Платформата е достапна на Android и iOS уреди.

„Верувам дека овој чекор ќе биде инспирација и за другите општини во државата. Заедно можеме да изградиме зелено, активно и дигитално општество“, заврши Ѓорѓиевски.

Градоначалникот Горан Герасимовски, ги повикува центарци да аплицираат на јавниот повик за субвенции за купување велосипеди, е-велосипеди, е-тротинети и дополнителна опрема. Општина Центар, активно го поттикнува користењето на алтернативни и еколошки превозни средства. Од 2022 година досега, доделени се 376 субвенции за велосипеди, 47 за е-велосипеди и е-тротинети, како и 7 субвенции за дополнителна опрема.

„Возењето велосипед е една од најдобрите навики што можеме да ги направиме за нашето здравје. Возењето велосипед е едноставен чекор со кој секој од нас може да придонесе за поздрава и почиста заедница. Еден велосипед повеќе значи едно возило помалку и помал метеж во сообраќајот. Ги повикувам сите центарци да аплицираат на повикот и заедно, со мали промени во секојдневието да донесеме големи придобивки за почист воздух и поздрава животна средина, да изградиме едно поубаво место за живеење“, вели Герасимовски.

Субвенцијата што се доделува изнесува 30% од вредноста на превозното средство, но најмногу до 3.000 денари, а за дополнителна опрема како детски седишта и заштитни кациги, граѓаните можат да добијат поддршка до 1.000 денари.

Јавниот повик е отворен од 24 март, а пријавувањето се врши по принципот „прв дојден, прв услужен“. Правото на субвенција е еднократно, а барањата се поднесуваат во архивата на Општина Центар, барака број 6, секој работен ден од 09.00 до 15.00 часот.

За сите дополнителни информации, заинтересираните можат да се обратат на телефонските броеви 02/3203-600 и 02/3203-693 или да ја посетат веб-страницата на Општина Центар: centar.gov.mk.

Некогашната скопска „златна кокошка“ ЈП Водовод и канализација минатата година ја завршил со загуба во работењето од рекордни 256 милиони денари, односно околу 4,2 милиони евра.

Ова е наведено во самиот финансиски извештај на најголемото градско претпријатие за годината 2024. Досега искажаната годишна загуба во работењето никогаш во последно време не била поголема од милион евра, а имало и години кога добивката била околу 2 милиони евра. Од работењето на ЈП Водовод и канализација Скопје зависат и приходите на двете комунални претпријатија „Паркови и зеленило“ и „Комунална хигиена“.

Кај наплатата се забележани нешто помали приходи од стопанството, а најголем дел од трошоците се остварени за платите на 1.066 работници како просечен број на вработени во 2024. Вкупните трошоци се зголемиле на 1,9 милијарди денари (31,4 милиони евра) и тие бележат раст од 10,5 отсто споредено со една година претходно.

„Трошоците за вработените учествуваат со 46,65 отсто од вкупните приходи од работењето за 2024 година, а 40,40 проценти во вкупните трошоци од работењето во 2024. Трошоците на вработените, кои се однесуваат на нето платите, придонесите и даноците – односно бруто платата за 2024 година е зголемена за 5,5 отсто во однос на 2023“, се забележува во отчетот.

За нето-плати во 2024 биле поделени 490 милиони денари, споредено со 464 милиони денари во 2023 година. Сепак тука влегува и 13-тата бонус плата за годишен одмор, која е надвор од трошокот за регрес. Чисто за редовно работење биле исплатени 405 милиони денари за нето плати. Според тоа, излегува дека просечната месечна нето плата во „Водовод и канализација“ била 31.660 денари минатата година.

Претходната година загубата на ЈП Водовод и канализација – Скопје изнесуваше 350.000 евра. Последен пат добивка била прикажана за 2020, тогаш од милион евра

Извор: faktor.mk