Градоначалникот на Битола, Тони Коњановски вели дека уште во саботата, ден пред временската непогода, односно обилните врнежи од снег, се состана зимската служба во проширен состав, не само јавните претпријатија на Битола, туку и „Македонија пат“, Стрежево, ЕСМ Молика, Националниот парк, полицијата и сите оние кои можат да помогнат да се излезе во пресрет на ситуацијата.

„Можат да кажам дека подготвени влеговме во сето ова, обилните врнежи неможам да кажам дека не изненадија во јанаури, денеска состојбата е таква сите улици од прв и најголем дел од втор приоритет се исчистени. Екипите се на терен, можам да кажам веќе четириесетина сати, исто толку колку се и снежните врнежи. Иако според програмата која што ја имаме тие се задолжени во рок од шест сати после завршувањето на врнежите да бидат исчистени сите овие улици кои што ги наведов, но се разбира дека не чекавме таков момент, туку излегоа на терен екипите, потпомогнати од јавните претпријатија, ЈП „Нискоградба“ го има најголемиот товар, со оглед на тоа што тие се организатори на зимската служба, бевме цело време во контакт. Благодарам и на „Македонија пат“ која помогна освен во сето она што е и нејзина обврска. Останаа отворени приодите и кон националниот парк „Пелистер“ и кон „Стрежево“ каде има бесплатен превоз за оние што сакаат да скијат“ рече Коњановски.

Го прашавме дали граѓаните се задоволни од тоа какви се улиците.

„Секогаш има приговори, доаѓаат и до нас, до мене лично, до советниците, си ги проследуваме еден со друг, тие незадоволни и јас во целост не сум, еве да кажам дека секогаш ќе најдеме дека 100 процентно не можеме да излеземе во пресрет, но се трудиме сето она што е обврска сите пристапи до сите јавни институции, влезови-излези на градот, улиците од прв и втор приоритет да биде оспособено и навистина немавме застои, релациите кон сите населени места 65 кои што ги имаме во општината се пристапни, иако еве неколку години сме немале вакви снежни врнежи“ вели градоначалникот.

Го прашавме и за сумата од 250 ијади евра, за кои СДСМ обвини дека зимската служба е во колапст, односно дека седнале само за кафе и сликање.

„Сигурно не беше така. На опозицијата е да си коментира, јас тука нема воопшто да коментирам . Да кажам дека средствата кои што се во вкупна вредност од 17.226.000 денари, во кои делот на Јавното претпријатие за државни патишта за одржување на патишта во зимски услови е некаде околу 11 милиони денари и нашите 6.300.000 денари од нашиот буџет ја праваат таа вкупна вредност од 17.226.000 денари, меѓутоа за 194 километри. Така што сето она што треба благовремено да го набави општината, сол, ризла, сета онаа механизација која што треба да ја подготви јавното претпријатие „Нискоградба“ уште во претсезонаат беше направено. Јавното претпријатие „Нискоградба“ склучува договор и со подизведувач за одржување, како и секоја година зимската служба, така што не гледам во кој дел би биле замерките. Точно голема територија опслужуваме и така треба да биде и нема ништо спорно во тоа“ објасни Коњановски.

Со традиционалното дефиле под маски, денеска во Вевчани почна официјалниот дел од Вевчанскиот карневал, кој претставува едно од главните обележја на Вевчани за празникот Св. Василиј, односно Василица.

Во своето обраќање пред присутните, министерот за култура и туризам, Зоран Љутков, истакна дека  Вевчанскиот карневал е од особено значење за културниот и туристичкиот развој на нашата земја и дека негувањето на оваа традиција е она што нè прави посебни, она што ни дава идентитет и гордост.

„Секоја година, на Василица, овој карневал со својата над илјадагодишна традиција нè обединува сите нас, сите  добронамерници со карневалски дух од целиот свет. Ние сме горди на Вевчанскиот карневал бидејќи тој му порачува на светот дека македонскиот народ има обичаи и култура кои не изумираат, туку се пренесуваат од генерација на генерација. Министерството за култура и туризам и годинава, како и во годините што доаѓаат ќе продолжи со континуираната поддршка на овој наш национален бренд кој придонесува не само за културниот, туку и за туристичкиот развој на нашата земја“, рече Љутков.

Дефилето почна од почетокот на селото, движејќи се низ главната улица до центарот, каде што маскираните го вртат василичарското оро. Новата година, според Јулијанскиот календар, ќе биде дочекана вечер со огномет во центарот на Вевчани, а присутните ќе ги забавуваат „Љубојна“, Наум Петрески, оркестарот „Вевчани“, како и Перо Бели и Коки Биоритам.

Манифестацијата ќе заврши со традиционалното василичарско оро и палење на маските во центарот на Вевчани, на 14 јануари.

На Универзитетската клиника за ортопедски болести во Скопје успешно беше извршена трансплантација со имплант, односно коска од починат донор, која беше имплантирана на два прста кај 13-годишно дете со брахидактилија. Ова е првпат во Македонија да се изврши ваков тип на трансплантација, а детето има уреден постоперативен тек, соопшти Министерството за здравство.

Министерството изрази благодарност и честитки до целиот тим кој го водеше процесот, предводен од д-р Даница Поповска и доц.д-р Илир Шабани, како и до сите здравствени работници кои учествуваа во оваа важна трансплантација, вклучувајќи д-р Лилјана Ангелеска, д-р Теодора Божиновска, д-р Филип Видоевски, инструментарките Сузана Пејчиновска и Арјета Мемети, анестетичарот Менка Дојчиновска, радиолошкиот технолог Крешник Шеху и гипсерот Ирена Галевска.

Проф.д-р Билјана Кузмановска, национален координатор за трансплантација, изрази благодарност и најави дека ќе продолжат со уште посилно темпо за подигнување на свесноста за трансплантацијата како највисок акт на човекољубие.