„Бидете уверени дека ја имате поддршката на Франција која ја споделува Вашата амбиција за спроведување на реформите за членство во ЕУ и дека сме свесни дека таа трка не може да биде бесконечна бидејќи ве очекуваме што поскоро во европското семејство“.

Ова го изјави Претседателката на Националното собрание на Француската Република, Јaел Брон Пиве, на средбата со Претседателот на Собранието, Африм Гаши, која се одржа во Париз.

„Претседателот на Собранието, Африм Гаши, заедно со пратениците Бети Стаменкоска-Трајкоска, Борче Цветков и Саранда Имери Стафаи, денеска остварија средба со Претседателката на Националното собрание на Француската Република, Јaел Брон Пиве. На средбата присуствуваа и потпретседателката на Комсијата за надворешна политика, Елеонор Каруа, потпретседателот на Комисијата за европски прашања, Лоран Мазори, и генералниот секретар на Националното собрание и на Претседателството, Дамиен Шамиси“, соопшти Собранието на РСМ.

Претседателот Гаши, се вели во соопштението, изрази особено задоволство од одржувањето средбата, со оглед на фактот што долги години наназад, отсуствува средба во ваков формат во Париз, и надеж дека истата ќе ја исцрта траекторијата на идни средби и ќе внесе силен импулс на плодна соработка меѓу нашите парламенти на сите нивоа. Беше потенцирано дека Собранието исклучително ја цени активната француска парламентарна заложба и поддршка за нашите евроинтеграции. Во тој контекст, беше посочено дека за донесувањето на уставните измени, потребни се идни гаранции за спроведување на процесот за пристапување во ЕУ и оценување на земјата исклучиво согласно Копенхагеншките критериуми и новата методологија за преговори.

Претседателката Брон Пиве ја потенцираше важноста на парламентарната дипломатија како важен сегмент во надворешната политика, вклучително и во контекст на ЕУ, како и честа да биде домаќин на делегација од Собранието на Република Северна Македонија. Беше пројавен интерес за актуелниот статус на домашната европска агенда, постапката за отворањето на преговарачките кластери и за отворените прашања на патот кон ЕУ, се наведува во соопштението на Собранието.

– Бидете уверени дека ја имате поддршката на Франција која ја споделува Вашата амбиција за спроведување на реформите за членство во ЕУ и дека сме свесни дека таа трка не може да биде бесконечна бидејќи ве очекуваме што поскоро во европското семејство – заклучи Брон Пиве.

Двајцата соговорници, се вели во соопштението, го потврдија взаемниот интерес за континуирано формирање групи за пријателство меѓу двата парламента, како и подготвеност за поблиска соработка на сите парламентарни нивоа на поле на европските прашања.

„Делегацијата, предводена од Претседателот на Собранието, Африм Гаши, во рамки на својата работна посета на Париз, денеска оствари средба и со Претседателот на Сенатот на Француската Република, Жерар Ларше. На средбата присуствуваа и претседателот на Комисијата за надворешни работи, Седрик Перен, претседателот на Комисијата за европски прашања, Жан Франсоа Рапен, претседателот на Групата за пријателство Франција – Западен Балкан, Марта де Сидрак, и заменик-претседателот на Групата за пријателство Франција- Западен Балкан, Арно Базен“, се додава во соопштението.

Претседателот Ларше, се наведува во соопштението, посакувајќи му топло добредојде на својот соговорник, потенцираше на историскиот момент бидејќи ова е првпат, од независноста, Сенатот да биде домаќин на Претседател на Собрание на Република Северна Македонија и дека нејзиното одржување е јасна порака за нашиот интерес да отпочнеме подиректна соработка на теми од взаемен интерес. Тој јасно нагласи дека Сенатот го поддржува членството на земјата во ЕУ, како и средствата од европските фондови за унапредување на тој процес. Беа поздравени сложените компромиси и реформски чекори од наша страна, како и нашата усогласеност со барањата на ЕУ и позициите на Заедничката надворешна и безбедноста политика.

„Претседателот Гаши, искажа особена благодарност за реализацијата на посетата и за придонесот на француските државници во градењето на нашата држава. Темелите на кои почива француската држава, „слобода, еднаквост и братство”, како основни цивилизациски вредности, треба да бидат подеднакво почитувани од сите и негирањето на истите не смее биде дозволено на светско ниво, но и во европски рамки. Во однос на евроинтеграциите, беше истакнато дека одогловлекувањето на процесот, за држава која прва ја потпишала Спогодбата за стабилизација и асоцијација од сите земји регионот, а и усложнувањето на пристапувањето со билатерални прашања, значително го доведува во прашање кредибилитетот на ЕУ, ги зајакнува влијанијата од трети страни и ја намалува поддршката кај граѓаните за членство во Унијата. Гаши апелираше за позасилен француски ангажман, со цел што поскоро отворање на првиот преговарачки кластер“, се додава во соопштението на Собранието на РСМ.

Соговорниците, се вели во соопштението, беа согласни дека значително отсуствува соработката на економски план и степенот на француски инвестиции во земјата, со заложби за нивно зголемување во иднина. Истовремено, на парламентарно ниво, заеднички беше ставот дека соработката треба да се продлабочува на поле на европските прашања, за кои целосно на располагање стои Сенатот на Француската Република.

Свети Никола е голем македонски празник, а како слава го има речиси секое второ православно семејство. Трпезата е посна, а Свети Никола меѓу другото, се смета за заштитник на морињата.

Празникот Свети Никола, кој на 19 Декември го слават православните христијани во Македонија, заедно со Свети Димитрија (Митровден) и Пресвета Богородица, се трите најмасовни домашни слави што се прославуваат во Македонија.

Сепак, Свети Никола е еден од празниците што македонските православни верници најмногу го слават како домашна слава или, пак, како именден. Речиси секое второ семејство овој ден го празнува како слава. Свети Никола е најпразнуваниот светец и многу македонски семејства вечерта ќе го прослават празникот со богата посна трпеза, на која преовладуваат риба, посно гравче и посни сарми.

Во Македонија и во светот има безброј цркви, манастири, икони и фрески посветени на овој светец. Овој светец имал многу возбудлива животна приказна, која со векови ги фасцинира христијаните.

Роден во малоазискиот град Патара, пристаниште на медитеранскиот брег на денешна Турција, свети Никола живеел во 4 век, многу пред расколот помеѓу Православната и Католичката црква од 1054 година.

Неговите богати родители Теофан и Нина, го добиле синот Никола во време на владеењето на римскиот цар Валеријан (253 – 260 година), алчен човек што поради страста за златото организирал воен поход на Персиското Царство. Младиот Никола растел во такво нестабилно опкружување.

Кога неговите родители умреле во големата епидемија, Никола го разделил целото наследено богатство. Никола е избран за архиепископ мирликиски. Бил и еден од архиепископите што се повикани пред царот Константин на саборот во Никеја во 325 година.

Свети Никола умрел на 19 декември 343 година. Погребан е во соборната црква „Мирликиска митрополија“, а кон крајот на 11 век неговите мошти се пренесени во Бари, во манастирот „Свети Јован Претеча“.

Професорот од Теолошкиот факултет во Скопје Ратомир Грозданоски вели дека свети Никола е еден од светителите што ги празнуваат сите христијани и имаат еднаква почит кон него, и католиците и православните, но интересно е што го празнуваат и протестантите.

– Името Никола е многу распространето и се среќава и меѓу православните, и кај римокатолиците, и кај протестантите, како: Никола, Николај, Николаос, Ник, Никол, Ниче, Коле, па Николина, Ники… На сите овие имиња коренот им е од Никола. Сите тие се носители на едно прекрасно име – на името свети Никола – објаснува професорот Грозданоски.

Христијаните веруваат дека Свети Никола Чудотворец на многу пати ги спасувал изгубените бродови и поради тоа тој е заштитник на морепловците, рибарите, бродовите. Во христијанскиот календар, свети Никола се слави на 6 декември според стариот Јулијански календар т.е. на 19 декември, според новиот Грегоријански календар.

И во прозните народни умотворби еднаш се раскажува како Св. Никола ги помага сиромасите, друг пат како добил два празника во годината. Така на пр. во една приказна запишана од ѓаконот Јосиф, од манастирот Пречиста Кичевска, објавена во цариградскиот весник “Новини” кон крајот на минатиот век, се раскажува дека едно време другите светци му завиделе на св. Никола затоа што многу бил почитуван и се поплакале на Бога.

Бог ја примил поплаката и веднаш испратил два ангела да го повикаат св. Никола. Тие откако не го нашле по небото и по земјата го здогледале во стреде море како крепи една гемија готова да потоне.

Му ја пренесле заповедта, а тој ги замолил да му помогнат да ја извадат ѓемијата на суво. Виделе-не виделе ангелите му помогнале, а потоа така накиснат и со искинати алишта го одвеле пред Господа.

Тука во тој момент биле собрани и сите светци што се оплакувале на него. Господ само ги погледнал и ништо не рекол, а тие од погледот разбрале дека ако сакаат да бидат почитувани како свети Никола треба да прават добри дела како што правел тој.

Тогаш, се вели во оваа приказна, Господ заповедал за сите светци да има по еден ден во годината, за свети Никола два, а за преподобниот Касијан кој најмногу го кодошел на четири години еднаш да му се празнува денот на 29 февруари.

За Свети Никола строго е забрането да се работи, да се шие, мие, пере, пегла, чисти, како и да се јаде мрсна храна бидејќи празникот е посен. Постои верување дека на тој ден никој не треба да го потсетувате на долг, ниту додатно да му ја отежнувате положбата затоа што е должник.

Треба да се носат подароци за оние кои го слават Свети Никола. Меѓутоа и оние кои го слават празникот по некои обичаи на некои места во земјава своите гости не треба да ги пуштат со празни раце, туку мора да им дадат дарови пред да си одат дома.

Од страна на Одделот за внатрешна контрола, криминалистички истраги и професионални стандарди поднесен е предлог за поведување на постапка за утврдување на одговорност за кршење на работната дисциплина против Б.Ј. и Б.А..

Во врска со преминувањето на државната граница на Граничниот премин „Долно Блаце“ од страна на А.Г. иако имал активна мерка на стоп листа „задржи и веднаш извести“, на 15.12.2024 Одделот за внатрешна контрола, криминалистички истраги и професионални стандарди постапи и по извршени проверки, извршен увид во службените материјали и по извршена анализа од обезбедени снимки од безбедносните камери од ПС за ГП „Долно Блаце“, Одделот утврди дека полицискиот службеник Б.Ј. со своето несовесно работење не извршил адекватни проверки за патничко моторно возило „мерцедес“ при премин на државната граница на излез од РМ, не го евидентирал за остварување на излез од РМ и патниците од предметното возило А.П. со дипломатска патна исправа како возач и А.Г. со македонска патна исправа како совозач во возилото ги завел дека пешки ја поминале границата, односно со пропуштање на должниот надзор извршил гранична проверка во системот СКПВ за лицето А.Г. и при тоа не почекал системот да утврди дали предметното лице има активна мерка „задржи и веднаш извести“ туку веднаш на лицата им ги дал патните исправи, по што тие го напуштиле граничниот премин.

Со наведените дејствија, Б.Ј. постапил спротивно на чл. 12 т.1, чл. 13 с.1 т.8 од Законот за гранична контрола, со што сторил потешко кршење на работниот ред и дисциплина. Во врска со настанот, од страна на Одделот за внатрешна контрола до ОЈО за ГОКК – Специјализирано оддление за гонење на кривични дела сторени од страна на полициски службеници и затворска полиција доставено е известување заради запознавање на јавниот обвинител.

Исто така, од страна на ОВККИПС беше утврдено дека од страна на раководителот на смена Б.А. било сторено потешко кршење на работниот ред и дисциплина бидејќи истиот како раководител на смена имал обврска навремено да ги задолжува и раздолжува полициските службеници на смена со Мобилен систем за снимање со камери и тоа уредно да го евидентира во Евиденцијата за задолжување и техничка исправност на МССК. Истиот откако ги задолжил сите полициски службеници со МССК и истото го завел во евиденцијата, во 07:30 часот, од страна на полициски службеници Б.Ј., С.Ф., Б.А., Ф.Ф. и Е.Ш., било пријавено дека МССК не им работат бидејќи им се испразниле батериите.

Од страна на раководителот на смена Б.А. истите полициски службеници не биле задолжени со други МССК, бидејќи батериите не можеле да се наполнат. Од извршениот увид во горенаведената евиденција од страна на ОВККИПС исто така беше утврдено дека од страна на раководителот на смена Б.А. откако МССК биле вратени, истите не биле заведени во графите како раздолжени во самата евиденција, а воедно и не ја пополнил графата за забелешка каде што требало да го нотира настанатиот проблем со МССК.

Од страна на Одделот за внатрешна контрола, криминалистички истраги и професионални стандарди поднесен е предлог за поведување на постапка за утврдување на одговорност за кршење на работната дисциплина против Б.Ј. и Б.А..

Против полицискиот службеник Б.Ј. Одделот изрече задолжителна мерка отстранување од работно место-суспензија до завршување на дисциплинската постапка.