Новоизбраниот американски претседател Доналд Трамп во петокот изјави дека неговата инаугурација во понеделник ќе се одржи во затворен простор на вашингтонски Капитол, наместо на отворено, поради очекуваните многу ниски температури.

„Наредив инаугуративното обраќање, со молитвите и другите говори, да се одржи во ротондата на американскиот Капитол, што ја користеше и Роналд Реган во 1985 година, исто така поради многу студено време“, напиша Трамп во објавата на својата социјална мрежа Truth Social.

„Временската прогноза за Вашингтон, со факторот на студ на ветерот, може да доведе до рекордно ниски температури. Не сакам да видам луѓе повредени на кој и да е начин“, додаде Трамп.

Последен пат заклетвата беше преместена во затворен простор на втората инаугурација на поранешниот републикански претседател Роналд Реган.

Трамп, исто така, рече дека неговите поддржувачи може да ја следат церемонијата на екраните во „Capital One Arenа“ во центарот на Вашингтон, која може да прими 20.000 луѓе.

Мел Гибсон, Силвестер Сталоне и Џон Војт се назначени од новоизбраниот американски претседател Доналд Трамп за  „специјални амбасадори“ на Холивуд, со цел да ја направат филмската индустрија „посилна од кога било“, објави „Би-би-си“.

„Голема чест ми е да објавам дека Џон Војт, Мел Гибсон и Силвестер Сталоне ќе бидат специјални амбасадори во големиот, но многу проблематичен Холивуд, во Калифорнија“, напиша Трамп синоќа на својата социјална мрежа „Truth Social“.

„Тие ќе бидат мои специјални претставници да го вратат Холивуд, да биде голем, подобар и посилен од кога било, а кој во последните четири години загуби многу бизниси поради странска конкуренција“ – дополни Трамп.

Тројцата актери, добитници на 10 номинации за „Оскар“ и три „Оскари“, се издвоија во Холивуд со поддршката на републиканецот Трамп, за разлика од многумина нивни колеги кои традиционално ја подржуваат Демократската партија.

Републиканците традиционално не се популарни меѓу претставниците на шоу бизнисот во САД и многу ѕвезди како Тејлор Свифт и Џорџ Клуни, на претседателските избори во 2024 година ја поддржаа Камала Харис, кандидатка од Демократската партија.

Пожарот кој уништи луксузни делови од Лос Анџелес, согорувајќи 96 квадратни километри, предизвика бројни полемики во јавноста, и тоа не само во самата држава, туку и многу пошироко. 

Од бројните теории, меѓу кои и многу тории на зговор, низ медиумите веќе на големо се пишува за можната причина за пожарот.

Некои извештаи ја истражуваат теоријата дека пожарот во Палисадес може да се поврзе со претходен пожар што бил изгаснат во раните утрински часови на новогодишниот ден, пишува Гардијан.

Пожарот избувнал нешто по полноќ во 2025 година во област која наликувала на местото каде што подоцна избил пожарот во Палисадес.

Извори кои анонимно зборуваат за Лос Анџелес Тајмс рекоа дека истражителите веруваат дека изворот на пожарот би можел да биде блиску до местото каде што избувнал пожарот за Нова година.

Како што продолжуваат напорите за гаснење на пожарите што го опустошуваат Лос Анџелес, властите почнаа да ги истражуваат причините и потеклото на пожарот кој однесе најмалку 24 животи и уништи илјадници домови.

Палисадес е популарен кај посетителите, што го наметнува прашањето дали пожарот можел да биде предизвикан од луѓе.

Истражителите ја разгледуваат можноста новогодишниот пожар да бил предизвикан од огномет, иако официјалните лица се уште не ја утврдиле точната причина.

Пожарот беше изгаснат околу 4 часот и 30 минути на Нова година, а временските услови тој ден беа значително помирни отколку неколку дена подоцна, кога избувнаа нови пожари.

Локален жител, кој сакаше да остане анонимен, изјави за „Вашингтон пост“ дека истражителот кој го посетил квартот по новогодишниот пожар сугерирал дека луѓето кои престојувале во областа можеле да предизвикаат мал пожар. Локалниот жител додаде дека неговото семејство слушнало огномет во областа каде што избувнал пожарот на Нова година.

Експертите за пожари изјавија за Пост дека е можно повторно да се разгорат пожарите, дури и неколку дена по нивното гаснење, бидејќи топлината може да остане заробена во корените на дрвјата. „Знаеме дека пожарите повторно се активираат и преминуваат од тлеење до пламнување“, изјави за Пост Мајкл Голнер, пожарникар и професор на Универзитетот во Калифорнија, Беркли. „Апсолутно е можно нешто од претходниот пожар да може, во рок од една недела, повторно да се запали.

Два големи шумски пожари избија минатата недела, поттикнати од урагански ветрови кои донесоа прекумерна суша од внатрешните пустински области.

Најмалку 24 луѓе загинаа во пожарите од тогаш, објави медицинскиот преглед на округот Лос Анџелес.

Полицијата, наводно, се фокусира на можниот човечки фактор во истрагата за причините за смртоносниот пожар во Палисадес во Лос Анџелес.

Неколку извори во полициските сили рекоа дека потенцијалните линии на истрага вклучуваат огномети или неовластени лица кои кампуваат во областа.

Нагласувајќи дека не се донесени заклучоци, тие рекоа дека другите можности вклучуваат случајно палење на опремата и дека не е исклучено подметнување пожар.

Избор: Faktor.mk