Џо Бајден ќе присуствува на погребот на папата Франциск

Поранешниот претседател на САД, Џозеф Бајден, заедно со својата сопруга Џил, планира да присуствува на погребот на папата Франциск, кој ќе се одржи во сабота во Ватикан. Веста ја потврди портпаролката на Бајден, Кели Скали, додавајќи дека конечните детали за посетата сè уште се усогласуваат.

Бајден, кој е католик и имал повеќекратни средби со покојниот поглавар на Римокатоличката црква, му додели Претседателски медал за слобода во јануари, непосредно пред да ја напушти Белата куќа.

Американската телевизија CBS News, повикувајќи се на повеќе извори, претходно објави дека Бајден, кој одржувал блиски лични и професионални односи со папата Франциск уште од неговата посета на САД во 2015 година, има цврста намера да присуствува на погребната церемонија.

Папата Франциск беше избран за поглавар на Римокатоличката црква во 2013 година, за време на администрацијата на Барак Обама. Од неговиот кабинет информираа дека поранешниот претседател Обама нема да присуствува на погребот.

Сегашниот американски претседател Доналд Трамп и првата дама Меланија Трамп се очекува денес да отпатуваат за Рим.

Папата Франциск почина во понеделникот, на 89-годишна возраст, како последица од мозочен удар, по неколкумесечна борба со здравствени компликации. Неговото тело од средата е изложено во базиликата Свети Петар, каде десетици илјади верници и граѓани дојдоа да му оддадат последна почит.

На погребот се очекува присуство на бројни светски лидери, меѓу кои и украинскиот претседател Володимир Зеленски, францускиот претседател Емануел Макрон, италијанската премиерка Џорџа Мелони, британскиот премиер Кир Стармер и аргентинскиот претседател Хавиер Милеј.

Путин и специјалниот пратеник на Трамп, Стив Виткоф во Москва: Разговори за можен прекин на огнот во Украина

Средбата помеѓу рускиот претседател Владимир Путин и специјалниот пратеник на американскиот претседател Доналд Трамп, Стив Виткоф, заврши по три часа интензивни разговори во Кремљ, соопшти помошникот на Путин, Јуриј Ушаков.

Како што пренесуваат руските медиуми, главна тема на средбата била можноста за обновување на директни преговори помеѓу Русија и Украина, како и потенцијалниот договор за прекин на огнот.

„Разговорот беше фокусиран на украинската криза, особено на идејата за враќање на масата за преговори меѓу Москва и Киев“, изјави Ушаков, оценувајќи го состанокот како „конструктивен и корисен“.

Според него, средбата придонела за приближување на ставовите не само околу ситуацијата во Украина, туку и за други клучни меѓународни прашања. Дополнително, тој најави дека руско-американскиот дијалог ќе продолжи во „најактивен режим“ и на различни нивоа.

Ушаков посочи и на симболиката на датумот — состанокот се одржал на 80-годишнината од историскиот сојузнички контакт меѓу советските и американските трупи на реката Елба во 1945 година, за време на Втората светска војна.

„Овој историски момент го симболизира заедништвото меѓу нашите две земји во борбата против нацизмот“, истакна Ушаков.

На средбата присуствуваше и Кирил Дмитриев, директорот на Рускиот фонд за директни инвестиции.

Трамп: Крим ќе остане руски, Украина нема да влезе во НАТО

Претседателот на САД, Доналд Трамп, во најново интервју за магазинот Time изјави дека е подготвен да го признае анектираниот Крим како дел од Русија, притоа изразувајќи скептицизам во однос на можноста Украина некогаш да стане членка на НАТО.

Трамп повторно ја обвини Украина дека го предизвикала воениот конфликт со Русија, наведувајќи дека нападот од страна на Москва бил резултат на стремежите на Киев да се приклучи кон Северноатлантската алијанса.

„Мислам дека војната започна кога почнаа да зборуваат за влез во НАТО. Крим ќе остане руски“, изјави американскиот претседател.

На прашањето зошто претходно тврдел дека ќе го заврши воениот конфликт „првиот ден“ откако ќе дојде на власт, Трамп појасни дека станувало збор за фигуративен израз.

„Тоа беше претерување, кажано за да се потенцира сериозноста. Но, како и обично, лажните медиуми го издигнаа тоа на поинакво ниво. Луѓето, секако, разбираат дека не го мислев тоа буквално – но поентата е дека е време овој конфликт да заврши“, додаде Трамп.