Вицепремиерот и министер за транспорт, Александар Николоски, во интервју за МИА од Брисел, каде учествуваше на „Самитот ЕУ-Западен Балкан“ во организација на тинк тенкот Пријатели на Европа, истакна дека Македонија одамна заслужила да ги почне преговорите за членство во ЕУ.

Тој повика Унијата да изврши политички притисок врз оние земји кои го блокираат процесот на проширување, со цел да се овозможи негово продолжување.

Николоски посочи дека на Самитот, европските челници и дипломати „храбро“ признале оти процесот на проширување е пред сè политички, а дури потоа доаѓа исполнувањето на реформите и критериумите.

„Ако веќе знаеме дека процесот е политички, тогаш се потребни политички одлуки, и тогаш е потребно најголемите земји членки од ЕУ да постават јасна визија за регионот, јасна визија и за Македонија“, рече тој.

Во однос на уставните измени, вицепремиерот го постави клучното прашање: дали нивното усвојување е последниот услов, или пак земјата повторно ќе се соочи со вето за неколку години.

Тој инсистира на извесност во процесот и јасни рокови за почеток и завршување на преговорите, доколку се реализираат бараните реформи. Николоски нагласи дека се потребни гаранции дека Македонија нема повторно да биде блокирана.

Тој потенцираше дека процесот мора да биде двонасочен, при што и Бугарија треба да ги спроведе 14-те пресуди на Европскиот суд за човекови права во Стразбур кои се однесуваат на правата на Македонците во таа земја.

Николоски најави значајни поместувања во реализацијата на капиталните проекти во транспортниот сектор

Изградбата на брзата пруга кон Грција (Коридор 10) се очекува да започне следното лето, откако ќе завршат подготовките и ќе се избере изведувач.

Се очекува железничката врска Скопје-Софија да профункционира во 2031 година, доколку Бугарија работи со истата динамика.

Завршена е и првата делница Куманово-Бељаковце, додека на делницата Бељаковце-Крива Паланка се работи интензивно. За третата делница (до границата со Бугарија) се започнуваат подготовки за објавување тендер во текот на декември или јануари. Потпишан е  и меѓудржавен договор за реализација на меѓуграничниот тунел. Околу Нова година се очекува да биде пуштена во употреба нова делница од автопатот Охрид-Кичево, проект кој претходно беше напуштен.

Се работи и на избор на изведувачи за делницата Кичево-Букојчани. Активни се работите на Букојчани-Гостивар (Стража), каде се пробиени 17 од 32 километри.

Вицепремиерот најави дека за „многу скоро време“ ќе има целосно автопатско решение до Прилеп и до Битола, вклучувајќи го и автопатот Прилеп-Битола во должина од 40 километри, како и изнаоѓање решение за делот Прилеп-Фариш.

Се најавува и воспоставување на нови авиолинии, Скопје-Дубаи (преку „Флај Дубаи“) од февруари, Краков и Вроцлав за Охрид од мај, како и Виена (преку „Аустријан Ерлајнс“) директно за Охрид.

При крај е изборот на изведувач за системот „Њу Сингл Виндоу“, кој ќе овозможи електронско пополнување на сите документи за прекуграничен камионски транспорт, елиминирајќи го застојот на границите. Овој систем ќе се воведува и во Албанија и Србија, овозможувајќи превоз на стока од Драч до Нови Сад без запирање на граници.

Николоски очекува дека овие инфраструктурни проекти ќе доведат до двоцифрени бројки на раст во градежништвото, со раст над 10% веќе следната година. Според него, градежништвото, транспортот и логистиката се секторите кои ја движат македонската економија, со раст во транспортот и логистиката од 6,1% во првата половина на годината.

Битола блесна со ново уметничко ремек-дело! Во срцето на градот, во непосредна близина на Здравствениот дом и волшебната Стара чаршија, конечно е завршен импресивниот мурал со кој се слават три децении цврста поврзаност и пријателство меѓу Република Македонија и Австралија.

Оваа живописна креација, насликана во чест на 30-годишнината од билатералните односи, не е само украс, туку и моќен одраз на длабоките врски меѓу нашите две земји.

Австралискиот амбасадор за Македонија, Питер Трасвел, деновиве лично го промовираше муралот во Битола, нагласувајќи ја неговата важност.

“Овој проект е дело на еден од најдобрите австралиски мурал уметници. Муралот во Битола претставува разни симболи карактеристични и за Македонија и за Австралија, одразувајќи ги односите меѓу двете земји. Особено е значајно што оваа година одбележуваме 30 години меѓусебни дипломатски односи,” истакна амбасадорот Трасвел.

Авторот, светски познатиот уметник Финтан Меги, чии дела красат градови од Индија и Германија до САД, го вткал своето мајсторство во битолскиот ѕид.

Како што самиот Меги изјави за Тера, муралот е вистинска симфонија на симболи. Претставени се карактеристични македонски и австралиски цветови, спојувајќи ја природата на двата континента. Може да се забележат национални предмети, како и една од најпрепознатливите светски градби – славната Опера Хаус во Сиднеј. Најтрогателен дел се трите фигури – веројатно битолчани кои својот живот го продолжиле во далечната Австралија, симболизирајќи ја моќната дијаспора која е живиот мост меѓу народите.

Лидерот на Демократската унија за интеграција (ДУИ), Али Ахмети, соопшти дека следен протест за поддршка на поранешните команданти на ОВК, на кои им се суди во Специјализираните комори во Хаг, ќе се одржи во Скопје на 13 декември.

Според најавата, протестниот собир ќе започне во 13:00 часот на плоштадот „Скендербег“ во главниот град.

„На 13 декември, почнувајќи од 13:00 часот, ќе протестираме и во Скопје за да бараме правда и да покажеме поддршка за ослободителите кои неправедно се држат во затворите во Хаг. Планирано е протестот да се одржи на плоштадот „Скендербег“ во Скопје“, прецизираше лидерот на ДУИ.

Ахмети упати повик до Албанците да се приклучат на собирот, истакнувајќи ја целта за „демонстрирање на чистата борба за слобода и независност“.

Лидерот на ДУИ претходно учествуваше и на двата големи протести организирани во Приштина и Тирана, кои исто така беа посветени на поддршка на поранешните водачи на ОВК.

Во Судот во Хаг, на обвинителна клупа се наоѓаат и  Хашим Тачи, Кадри Весели, Јакуп Красниќи и Реџеп Селими, кои се товарат за воени злосторства извршени за време и по војната на Косово.

Извор: https://politika.com.mk/archives/48700?utm_source=rss&utm_medium=rss&utm_campaign=%d0%b0%d1%85%d0%bc%d0%b5%d1%82%d0%b8-%d0%bd%d0%b0%d1%98%d0%b0%d0%b2%d0%b8-%d0%bf%d1%80%d0%be%d1%82%d0%b5%d1%81%d1%82-%d0%b7%d0%b0-%d0%bf%d0%be%d0%b4%d0%b4%d1%80%d1%88%d0%ba%d0%b0-%d0%bd%d0%b0-%d0%bf