Македонската православна црква и нејзините верници денеска, 28 август, го слават празникот Успение на Пресвета Богородица, еден од најголемите христијански празници посветени на Богородица, која во народот е позната како Голема Богородица. Ова е значаен христијански празник, не само кај православните, туку и кај католиците и протестантите, посветен на смртта на Марија, мајката на Исус Христос.

Празникот ја одбележува земната смрт на Богородица и, според Евангелието, тоа е денот кога таа се вознесе на небото и го предаде својот дух во рацете на Спасителот.

Во исто време денеска завршува постот кој започна на 14 август, а верниците одат на причест во црква.

Преданието вели дека Богородица живеела 60 години, според некои извори 72, дека го надживеала својот син и како сведок на многу познати настани ја продолжила неговата мисија.

Во Светото Писмо нема информации за крајот на земниот живот на Богородица. Според преданието и списите, кои немаат свет карактер, се верува дека Богородица живеела во Ерусалим до крајот на својот живот, по смртта и воскресението Христово, опкружена со вниманието на апостолите и првата христијанска заедница.

Сите обичаи во врска со празниците посветени на Мајката Божја се засноваат на почитување на нејзиниот култ, во кој се вклопени верувања и ритуали од народната религија.

Деновите меѓу Голема и Мала Богородица се сметаат за најдобро време за берење лековити билки кои се користат за лекување на разни болести.

Се верува дека билките и тревите собрани на Голема Богоридица имаат исклучително лековити својства. Се берат боровинки и лековити билки, а се верува дека ќе донесат здравје и благосостојба за сите во домот.

Сите обичаи за овој ден се поврзани со водата и босилекот, за кој се верува дека е божјо растение. Затоа, според народното верување, денес во садот треба да ставите малку босилек и да го послужите на семејството. Се верува дека на тој начин Света Богородица штити од злото.

Се верува дека Богородица посебно ја разбира душата на секоја жена, ја разбира нејзината мисла, болка, страдање, желба. Затоа жените и се молат за заштита, среќа, здравје и внатрешен мир.

Празникот Успение на Пресвета Богородица е еден од дванаесетте најголеми христијански празници, посветен на денот кога таа се преселила на небото. Богородица се смета за заштитник на сите христијани и на градот Скопје