Битола ќе биде домаќин на уште еден значаен спортски настан, кој ќе привлече внимание од целиот регион. Сениорската женска ракометна селекција на Македонија, во сабота, 12 април 2025 година, со почеток во 19:00 часот, ќе го одигра квалификацискиот натпревар за Светското првенство во ракомет, против селекцијата на Полска. Натпреварот ќе се одржи во Спортската сала „Боро Чурлевски“ во Битола, каде љубителите на ракометот ќе имаат можност да уживаат во натпревар од светска класа.

„Овој натпревар е не само спортски настан, туку и прилика за граѓаните на Битола да покажат солидарност и хуманост. Продажната цена на влезниците за натпреварот ќе биде 100 денари, а средствата ќе бидат донирани за настраданите во Кочани“, изјави Тони Коњановски, градоначалник на општина Битола.

Тој посочи дека Битола, како град со традиција на спортски успеси, повторно ќе ја покаже својата посветеност на спортот и хуманоста, преку организирање на овој важен настан. Битолчани ќе имаат уникатна шанса да го гледаат натпреварот од светски рамки и да придонесат за помош на оние кои имаат потреба.

Четирикратниот Ф1 шампион Макс Ферстапен е победник на трката за Големата награда на Јапонија на патеката „Сузука“. Тоа е трета трка оваа сезона во Формула 1, а и прв триумф за Ферстапен, кој стартуваше и од пол позицијата.

На првите две трки победија возачите на Мекларен, Ландо Норис и Оскар Пиастри.

Актуелниот светски шампион, по вчерашната пол-позиција, ја задржа предноста од квалификациите и рутински стигна до победа на трката за Големата награда на Јапонија.

Зад него завршија двајцата возачи на Мекларен, Ландо Норис и Оскар Пиастри, додека четвртата позиција му припадна на возачот на Ферари, Шарл Леклер.

Потоа следуваше двоецот од Мерцедес, Џорџ Расел и Кими Антонели, додека Луис Хамилтон ја заврши трката на незадоволителната седма позиција. Во првите десет се пласираа и Изак Хаџар, Алекс Албон и Оливер Бирман.

Клучен момент на трката се случи во 22-от круг, кога и Ферстапен и Норис влегоа во боксот и излегоа речиси во исто време, при што Норис мораше да излезе на тревата и на тој начин остана зад Холанѓанецот.

Судиите на патеката ја прегледаа ситуацијата и одлучија дека нема причина да го казнат Ферстапен, кој така стигна до својата прва победа во новата сезона.