Долгогодишниот директор на ТТК Банка, Драгољуб Арсовски, ќе остане уште еден мандат на малата но успешна ТТК Банка. 

„Ве известуваме дека, со Решение на Гувернерката на Народната банка на Република Северна Македонија бр. 15-34165/9 од 25 декември 2024 година, издадена е претходна согласност за повторно именување (реизбор) на проф. д-р Драгољуб Арсовски за член на Управниот одбор на ТТК Банка АД Скопје. 

Во согласност со Одлуката на Надзорниот одбор на Банката 02-7540/5 од 30.9.2024 година со која проф. д-р Драгољуб Арсовски е повторно именуван (реизбран) за член, тој исто така е избран и за Претседател на Управниот одбор – Генерален извршен директор на ТТК Банка АД Скопје“, се векли во соопштението од ТТК Банка. 

Како што веќе објави Фактор, ТТК Банка спаѓа во рангот на малите но успешни банки, а на крајот на септември 2024 година имала актива од 160 милиони евра. 

Банката е една од најуспешните мали банки, секогаш остварува високи добивки, и таа е всушност креаторот на финансиската моќ на нејзиниот главен акционер, тетовксииот комбинат Тетекс, кој во ТТК банка има сопственост од над 41 отсто. 

Инаку, на почетокот на минатиот месец, Собранието на акционери на банката ги именувало Бобан Гоговски, Драгица Јовановска, Евгенија Трпоска, Михаил Петковски и Албион Риза, за членови на Надзорниот одбор на ТТК банка. 

Извор: Faktor.mk

Компанијата „Макпетрол“ сподели интересна ценовно чувствителна информација од своето работење, а која не е поврзана со некакви евентуални сопственички или менаџерски промени. 

Туку, станува збор дека на своите вработени им е поделен новогодишен надоместок, како што доликува на големи и успешни компании. 

„Имајќи ги предвид залагањата на вработените за извршување на работните обврски, а по повод Новогодишните празници, „Макпетрол“ А.Д. – Скопје, објавува дека на своите вработени им исплати новогодишен надоместок во нето износ од 30.000 денари. Грижата за вработените е значајна за успешноста на Друштвото на долг рок и претставува дел од корпоративната политика на „Макпетрол“ А.Д. – Скопје“, се вели во објавата како ценовно чувствителна информација на Берзата.

Во првите девет месеци од годинава „Макпетрол“ имаше одличен Биланс на успех. 

Односно, македонскиот нафтен гигант во периодот од јануари заклучно со септември годинава оствари оперативни приходи од над 377 милиони евра, или прецизно 377,2 милиони.

Чистиот профит, пак, е одлични 13 милиони евра за трите квартали, бележејќи и солиден пораст од 18 проценти.

Извор: Фактор.мк

Почнувајќи од денес, започнува со работа новата подрачна канцеларија на Агенцијата за катастар на недвижности, лоцирана во скопската населба Гази Баба, која првенствено е наменета за граѓаните на Гази Баба, но и за околните општини Чаир и Бутел. Подрачната канцеларија се отвора по цели 12 години и во неа граѓаните ќе можат поблиску, побрзо и полесно да ги добијат услугите на агенцијата од сите организациски единици.

Станува збор за целосно нов, опремен и реновиран простор, лоциран во скопската населба Автокоманда (улица Трифун Хаџи Јанев бр. 10), веднаш до дирекцијата на Агенцијата за катастар на недвижности.

„Отворањето на новата подрачна канцеларија е чекор напред во процесот на доближување на услугите до граѓаните, преку кои тие ќе бидат подостапни за секого. Оваа новина е во насока на доближување на услугите на агенцијата до граѓаните на една од најголемите и економски развиени општини во државата. И, не само Гази Баба, туку и Чаир и Бутел. Посебно задоволство ми е што на крајот на годината реализираме еден важен проект на кој заедно со мојот тим макотрпно работевме во изминатиот период“, истакна директорот на Агенцијата за катастар на недвижности, Иван Живковски.

Тој додаде дека и во следната година ќе продолжи фокусот на подобрување на корисничкото искуство, доближување на услугите до граѓаните, како и нивна модернизација и дигитализација, процеси кои веќе започнаа оваа година.

Живковски информираше дека подрачната канцеларија во населбата Автокоманда ќе биде отворена за граѓаните секој работен ден во периодот од 07:30-15:30 часот.