Речиси е извесно дека дивидендата, во годината во која Комерцијална банка има историски најдобри резултати, ќе биде повисока од тоа што акционерите го добија за 2023 година и изнесуваше 15 евра во бруто износ. Годинава за првите три квартали Комерцијална банка има неоданочена добивка која е двојно повисока од оданочениот профит за 2023 година. Затоа никого не треба да го чуди тоа што берзанската цена на таа акција е на историски рекордно ниво

Комерцијална банка најдоцна до 28 февруари ќе го објави износот на дивиденда што ќе ја подели од добивката во рекордната 2024 година на своите акционери. Ова е веќе официјална вест, потврдена од Комерцијална банка со објавата на „Календарот на настани во 2025 година“ што е достапен на веб страницата на Македонската берза на следниот линк https://www.seinet.com.mk/document/70836

Во таа објава кај ставката Други корпоративни настани во зграда е објаснето дека станува збор за цитираме „Собрание на акционери, исплата на дивиденда, и.т.н“. А при тоа е објавено дека повикот за наредното редовно Собрание ќе биде објавен на платформата СЕИ НЕТ во периодот меѓу 24 и 28 февруари годинава.

Од овој контекст на дадената информација може да се заклучи дека дивиденда сигурно ќе има, а најдоцна до 28 февруари ќе биде познато и официјално колкав ќе биде нејзниот износ. А секако таа информација најмногу ги интересира инвеститорите во нашата инвеститорска заедница.

За да се оформи целосно контекстот на значењето на погоре анализираната  информација мора да се наведе дека ова лето во интервјуто кое го даде Хари Костов, претседател на Управниот одбор и главен извршен директор на Комерцијална банка, кажа дека ова ќе биде најдобра година досега на најголемата банка во Македонија. И токму заради тоа и може да се очекува најголем до сега износ на дивиденда што банката ќе ја исплати на сите свои акционери.

И тука вреди да се потсети дека копроративната политика на Комерцијална банка декларира дека секогаш кога дозволуваат условите таа банка е подготвена да исплати во дивиденда до 72 отсто од нејзината добивка.

Тргувањето на берзата и досега отворено покажува високо изразен оптимизам и доверба на инвеститорите во акцијата на Комерцијална банка. Затоа што нејзината пазарна цена за прв пат во нашата корпоративна историја ја проби психолошката граница од 30.000 денари за една акција.

Ако дивидендата, која и официјално ќе се знае најдоцна за 38 дена, биде најголема досега, тоа само ќе биде причина плус таа акција, во песимистичко сценарио, да остане над границата од 30.000 денари за акција.

Според најновите актуелни податоци што ги објави таа банка, а се однесуваат за периодот јануари-септември 2024 година, Комерцијална банка за тој период има историски рекордна добивка (пред оданочување) од речиси 72 милиони евра. А тоа е за 46 отсто подобар резултат од  истиот период во 2023 година.

Всушност неоданочената добивка на оваа банка за три квартали во 2024 година е двојно повисока од профитот по оданочување што таа банка го пријави во 2023 година.

Така што, повеќе од сигурно е дека дивидендата што ја дели Комерцијална банка ќе биде повисока од тоа што го добија акционерите од добивката во 2023 година.

Вреди да се истакне и тоа што Комерцијална банка заедно со „Алкалоид“ и „Макпетрол“ се единствени од успешните компании, чии акции котираат на берзата, чија дивиденда во огромен износ завршува кај домашни акционери – физички лица и не оди во странство.

Извор: Faktor.mk

Министерството за финансии денес ја исплати еврообврзницата во износ од 500 милиони евра издадена во 2018 година.

„Денеска во целост ја исплативме еврообврзницата на износ од 500 милиони евра, издадена во 2018 година, а која доспеа за исплата на 18 јануари 2025 година. Со цел да се обезбедат средства по најниски трошоци за исплата на оваа еврообврзница, беше потпишан Договор за заем со Унгарската експорт-импорт банка. Условите под кои ги добивме средствата направија заштеди во Буџетот по основ на камати и по основ на провизии. Ќе продолжиме со политиките на редовно и навремено сервисирање на обврските и обезбедување средства по најповолни услови“, рече министерката за финансии Гордана Димитриеска-Кочоска и додаде дека 2025 година ја започнуваме со ликвидни и стабилни јавни финансии, кои ќе овозможат редовно и навремено сервисирање на обврските.

Средствата за сервисирање на оваа обврска  беа обезбедени преку заем од Унгарската експорт-импорт банка по поволни услови, со камата од 3,25%, рок на отплата 15 години и вклучен грејс период од 3 години.

Земјата досега има издадено девет еврообврзници, од кои шест се веќе исплатени, а во наредните години доспеаваат за отплата уште три еврообврзници издадени во 2020, 2021 и 2023 година во вкупен износ од 1,9 милијарди евра.

Најголемата приватна пошта во Македонија Еко логистиксервис (ЕЛС) вчера во Младинскиот културен центар (МКЦ) прослави седум години постоење под мотото „We are growing internationally“ („растеме интернационално“). На настанот беа присутни стотици гости кои дадоа поддршка на ЕЛС како општествено одговорна компанија која континуирано го шири своето портфолио со нови ангажмани и активности. 

„Во наредниот период нѐ чекаат уште многу предизвици, ќе го прошириме кругот, ќе бидеме најинтегриранатакомпанија, не само во Македонија туку и во регионот, ќе бидеме провајдер на други сервиси и на други платформи и компании, но една од најважните задачи е да дадеме можност на македонските компании да извезуваат и да станат појаки, да не бидеме како слаби играчи во сенка, туку да тргнеме во акција и да направиме резултат“, рече сопственикот на ЕЛС, Игор Гешовски, во своето обраќање пред присутните. 

Роденденот на ЕЛС беше одбележан со богата музичка програма – свои настапи имаа Лаура Кадриу и Филип Петровски со своите бендови, а комичарот Бојан Велевски ги забавуваше гостите со својот стенд ап. 

Како еколошки одговорна компанија која постојано се вклучува различни хуманитарни активности, ЕЛС по повод 7-годишнината од постоењето додели благодарници на повеќе еко здруженија и на хуманитарни организации. 

ЕЛС во последнава година ја презеде доставата за пратките од двете најголеми шопинг платформи, Али експрес и ТЕМУ, со што значително се зголеми и обемот на работа. Само во 2024 година, приватната пошта која ги поседува сите меѓународни и домашни лиценци, има доставено 417.777 пратки до потрошувачите. 

Во моментов компанијата располага со повеќе од 220 возила и над 250 доставувачи, а достава се врши и во попладневните часови. За поголема безбедност и заштита од манипулации, ЕЛС е единствената компанија која користи безбедносен код при подигањето на пратките.  За 2025 година, од компанијата најавуваат соработка и со други светски познати платформи.