Министерката за енергетика, рударство и минерални суровини, Сања Божиновска, оствари работна средба со ректорката на Универзитетот „Св. Кирил и Методиј“ во Скопје, проф. д-р Биљана Ангелова. На средбата беа отворени повеќе теми од заеднички интерес, со фокус на енергетската ефикасност, соработката меѓу Министерството и Универзитетот и можностите за поддршка на младите кадри, соопштија од Министерството за енергетика, рударство и минерални суровини.

Ректорката Ангелова ја истакнала важноста на енергетската стабилност за редовното функционирање на универзитетот, наведувајќи дека високите сметки за електрична енергија претставуваат значителен финансиски товар. Таа посочила дека Универзитетот бара начини за оптимизација на трошоците за електрична енергија, како и долгорочно и одржливо решение.

-Иако Македонија повеќе од година и половина успешно ја менаџира својата берза за електрична енергија, која функционира преку националниот Оператор за пазар на електрична енергија (МЕМО), повеќето државни и јавни институции, вклучувајќи ги училиштата, болниците и комуналните претпријатија, се соочуваат со сериозни предизвици. Овие институции се обврзани да купуваат електрична енергија на слободниот пазар, плаќајќи по цените што се формираат на берзата ХУПЕКС во Унгарија. Иако се работи за некомерцијални субјекти, над 200 јавни установи моментално плаќаат просечна дневна берзанска цена за струја, што значително ги оптоварува нивните буџети, се вели во соопштението.

Министерката Божиновска ја истакнала подготвеноста на Министерството да ги разгледа можностите за олеснување на оваа ситуација и потенцирала дека решавањето на овој проблем е од суштинско значење за подобрување на енергетската одржливост на јавниот сектор и за ослободување на средства кои би можеле да се инвестираат во други развојни проекти.

Министерката и ректорката разговарале и за важноста од стимулирање на студентите и создавање услови кои ќе ги мотивираат младите и перспективни кадри. Министерката Божиновска истакна дека развојот и поддршката на младите се меѓу клучните приоритети на Министерството, при што е подготвена да иницира и поддржи заеднички проекти со Универзитетот кои ќе придонесат за развој на нови таленти и обезбедување стручни кадри во енергетскиот сектор.

Министерството за енергетика, велат оттаму, останува посветено на пронаоѓање на одржливи решенија за оптимизација на енергетските ресурси и обезбедување економска стабилност за институциите и граѓаните.

Побарувачката за луѓе кои ги разбираат податоците и знаат како да ги толкуваат за да го подобрат бизнисот далеку ја надминува понудата. Имено, доколку сакате да заработувате 7.000 евра месечно работејќи од дома, размислете за кариера како аналитичар на податоци.

Аналитичарот на податоци собира, организира и толкува необработени податоци за подобро да ги разбере операциите на компанијата.

Користејќи алатки како Excel, SQL и Tableau, аналитичарите ги идентификуваат трендовите и создаваат визуелизации, анализирајќи ги клучните метрики како што се продажбата, сообраќајот на веб-страниците и регулаторните ризици, за да го подобрат работењето на компанијата.

– Нишата за анализа на податоци е поле кое брзо расте што на потенцијалните вработени им нуди одлични плати, стабилно и сигурно работно место и флексибилност – вели Лиза Гевелбер, потпретседател на Google и основач на онлајн курсот Grow With Google.

Бидејќи сè повеќе деловни одлуки – од оптимизирање на работните процеси до предвидување на однесувањето на клиентите – се потпираат на податоци, не е изненадување што побарувачката за стручни аналитичари на податоци е на највисоко ниво на сите времиња. Според истражувањата, анализата на податоците е една од најбараните вештини оваа година.

Побарувачката за аналитичари на податоци се предвидува да порасне за една третина во следните десет години, три пати повеќе од која било друга професија. Исто така, според податоците на Google, најпребарувани термини оваа година биле оние кои се однесуваат на подобрување на вештините за анализа на податоци. Во моментов има недостиг од 300.000 професионалци за анализа на податоци во САД.

Како да станете аналитичар на податоци без диплома

Се повеќе компании вработуваат аналитичари на податоци без високо образование поради големата побарувачка на пазарот на труд. Повеќето отворени позиции бараат диплома од средно образование, со дополнителен сертификат или стручен курс.

Аналитичарите на податоци мора да бидат вешти во работа со табеларни пресметки и програмски јазици, да визуелизираат и презентираат обработени податоци и што е најважно, да можат да решаваат проблеми.

Се препорачува и употреба на вештачка интелигенција за чистење и уредување на податоци, кодирање и визуелизација.

Натпросечна плата и работа од дома

Побарувачката за аналитичари на податоци постои во речиси сите сектори, но тие се најбарани во производствениот, здравството, технологијата и финансискиот сектор. Некои од поврзаните занимања вклучуваат анализа на деловни системи, дизајн на бази на податоци и администрација на бази на податоци.

Она што е дополнително атрактивно е платата која во просек изнесува околу 8.000 евра месечно (околу 100.000 евра годишно), додека во некои сектори може да достигне и 12.000 евра месечно.

Со сето тоа, работата од дома обезбедува дополнителна флексибилност, бидејќи без разлика каде живеете, побарувачката за експерти кои ги разбираат податоците и знаат како да ги користат за подобрување на вашиот бизнис далеку ја надминува понудата.Извор: Телеграф.рс

Од АД МЕПСО велат дека од почнувањето на проектот досега се реализирани само 24 од планираните 269 фундаменти за столбови (8,9%), доставени се 51,2% од опремата, а изведувачот неколку пати го напуштал градилиштето.

Раскинат договорот со „Енергоинвест“ ДОО Сараево, Босна и Херцеговина, изведувач на изградбата на 400 киловолтен далекувод од ТС Битола 2 до македонско-албанската граница, информира АД МЕПСО.

Од компанијата целат дека изведувачот не ги исполнил обврските, а барал повеќе пари.

„До неодложно раскинување на договорот доведе неисполнувањето на обврските од страна на изведувачот и барањата на изведувачот за дополнителни плаќања, поради значителното зголемување на трошоците за материјали и услуги. Тоа доведе до неможност за постигнување согласност меѓу двете страни. Договорот со „Енергоинвест“ ДОО Сараево, Босна и Херцеговина, беше склучен на 7 февруари 2020 година, со рок за завршување од 30 месеци. Рокот истече на 30.5.2023 година. Треба да се истакне дека во овој период, изведувачот неколку пати го напушташе градилиштето, барајќи дополнително плаќање, што беше одбиено од АД МЕПСО заради типот на договорот, клуч на рака“, соопшти МЕПСО.

Од МЕПСО додаваат дека и покрај повеќекратните напори за усогласување и преговарање, не бил постигнат договор и затоа е донесена одлука тој да се раскине.

„Од почнувањето на проектот досега се реализирани 24 од планираните 269 фундаменти за столбови (8,9%), а доставени се 51,2% од опремата. Имајќи ја во предвид настаната ситуација, слабата динамика, напуштањето на работата, цениме дека раскинот на овој договор, всушност претставува почеток на завршување на овој проект, кој е врвен приоротет за АД МЕПСО и за Владата. АД МЕПСО останува посветен на завршувањето на 400 кВ интерконекцијата со Албанија и веќе започна подготовки за рестартирање на проектот. Успешната реализација на оваа интерконекција останува приоритет, бидејќи ќе ја зајакне регионалната енергетска стабилност и интеграција, со значителни придобивки за Македонија, Албанија и за регионот во целина“, велат од АД МЕПСО.

Друштвото ќе иницира нова тендерска постапка според насоките на ЕБОР за избор на нов изведувач кој ќе продолжи со изградбата.