Рускиот претседател Владимир Путин не се откажува од својата амбиција да ја контролира Украина, и покрај напорите на САД да посредуваат за постигнување на прекин на огнот, објави Вашингтон пост, повикувајќи се на извори запознаени со доверливите извештаи на американските разузнавачки служби.

Според еден американски функционер, Путин има „долгогодишна желба да ја обнови ‘Мајката Русија’“ и останува решен да ја воспостави контролата врз Киев.

Оваа проценка беше вклучена во разузнавачките извештаи доставени до администрацијата на американскиот претседател Доналд Трамп на 6 март.

Некои официјални лица веруваат дека дури и доколку Русија се согласи на привремен прекин на огнот, Москва би ја искористила паузата за повторно вооружување, кршење на договорот и извршување провокации кои потоа би ги припишала на Украина.

Пред три дена, за време на преговорите во Џеда, Украина се согласи на 30-дневен прекин на огнот, под услов Русија да го стори истото. Овој договор доведе до обновување на воената и разузнавачката поддршка од страна на Вашингтон за Киев.

Путин вчера изјави дека Русија е подготвена да го прифати американскиот предлог за прекин на огнот, но само ако Украина ја прекине мобилизацијата, воената обука и увозот на оружје.

Украинскиот претседател Володимир Зеленски ги отфрли условите на Путин како „руска манипулација“ и повика на посилни санкции против Москва.

Трамп, кој претходно предупреди на „погубни“ финансиски последици за Русија доколку војната се продолжи, вчера изјави дека изјавата на Путин е „многу ветувачка“, но „не е целосна“.

Европски разузнавач за Вашингтон пост изјави дека Москва го гледа Трамп како слаб, непринципиелен и потенцијално подложен на манипулации, врз основа на последните разузнавачки информации.

Ако се постигне траен прекин на огнот, Русија најверојатно ќе се врати на „хибридни“ методи како пропаганда, економски притисок и сајбер напади кои ги користеше против Украина пред инвазијата во 2022 година, додаде функционерот.

Американските власти се уште се внимателни во проценката на можните мировни услови што Путин би можел да ги прифати, но не гледаат знаци дека тој се откажал од своите напори да го врати Киев под руска контрола.

Западни безбедносни извори за Блумберг претходно изјавија дека Путин поставил „максималистички“ барања за територијални отстапки, мировни сили и украинска неутралност, свесен дека овие услови се неприфатливи за Киев и европските земји.

Еден месец по првиот телефонски разговор, американскиот претседател Доналд Трамп откри дека имал и втор контакт со рускиот претседател Владимир Путин.

Според Трамп, разговорот бил продуктивен и добар, а тој истакнал дека постојат шанси за ставање крај на војната. Меѓутоа, како што наведе на социјалните мрежи, од Путин категорично побарал да се поштедат илјадници украински војници, за да се спречи катастрофален масакр. Трамп не ги наведе точните локации каде што се тие опколени, но проценките сугерираат дека станува збор за регионот на Курск, каде што руската војска започна офанзива.

„Во овој момент, илјадници украински војници се целосно опколени од руската војска и се наоѓаат во многу тешка ситуација. Јас категорично побарав од претседателот Путин да ги поштеди нивните животи. Тоа би било ужасен масакр, каков што не сме го виделе од Втората светска војна“, напиша Трамп.

Рускиот претседател Путин, пак, на вчерашната прес-конференција ги предупреди украинските војници да се предадат или да се соочат со смрт. Путин исто така посочи дека го поддржува 30-дневното примирје, договорено меѓу претставниците на Вашингтон и Киев во Саудиска Арабија, но со предуслови, особено за мировниците кои ќе го следат примирјето.

„Ситуацијата во Курск е целосно под наша контрола. Групата која изврши инвазија на нашата земја е во изолација. Тие се целосно опколени и под огнена контрола. Ако физичката блокада се случи во следните неколку дена, ќе имаат само две опции – да се предадат или да загинат“, изјави Путин.

Портпаролот на Кремљ, Дмитриј Песков, потврди дека рускиот претседател се сретнал со специјалниот американски пратеник Стив Виткоф, кој му пренел порака од Трамп. Песков истакна дека кај руските власти постои претпазлив оптимизам, а според него, двете страни имаат разбирање дека се потребни директни разговори меѓу двајцата претседатели. Посетата на Виткоф во Москва следува по средбите на американските и украинските претставници во Саудиска Арабија.

Советникот за национална безбедност на Трамп, Мајк Валц, кој беше дел од преговорите во Џеда, за прв пат откри дека на маса се ставени и територијални отстапки.

„Украинската делегација беше многу отворена, имавме одлични разговори. Во еден момент дури отворивме мапа и почнавме да цртаме како да ја завршиме војната“, изјави Валц.

Украинскиот претседател, Володимир Зеленски, истакна дека нема намера никогаш да ги признае окупираните делови од Русија. Според него, иако САД и Украина се договорија за 30-дневно примирје, Москва намерно ја одолговлекува одлуката, бидејќи не сака да му соопшти на Трамп дека има намера да ја продолжи војната. Како што додаде Зеленски, Путин разгледува идеја за прекин на огнот со предуслови кои нема да бидат прифатливи за никого.

Путин очигледно ја воочил слабоста во американскиот предлог за прекин на огнот и сега ја искористува за да ја префрли одговорноста на Трамп, наведува BBC во својата анализа.

Рускиот претседател нагласува дека не е возможно „веднаш“ да се постигне прекин на огнот без претходен договор за условите, што го опструира барањето на Трамп за почеток на примирје, а потоа преговори.

Иако Путин тврди дека ја поддржува идејата за завршување на војната за да не биде обвинет за кочење на мировниот процес, јасно е дека сака прекин на огнот по негови правила. Тој ги враќа на маса деталите за предлогот за прекин на огнот, особено во однос на повлекувањето на украинските сили.

Клучното прашање на кое во Вашингтон нема одговор се територијалните концесии. Путин упорно бара признавање на анексијата на четирите региони, што украинскиот претседател, Володимир Зеленски, категорично го одбива, не сакајќи да го легитимира украденото украинско земјиште. Покрај тоа, советникот на Зеленски ја исклучи можноста за замрзнат конфликт, што дополнително ја комплицира положбата на Трамп.

На претходниот состанок на министрите за надворешни работи на Г7 самитот во снежниот Квебек, американскиот државен секретар, Марк Рубио, избегнал да го коментира одговорот на Кремљ. Очигледно е дека одлучил да молчи додека специјалниот пратеник на Трамп не донесе информации во Вашингтон за тоа што рекол Путин во доверливите разговори.

Разговорот помеѓу Стив Виткоф и Трамп сега станува клучен за тоа како американскиот претседател ќе реагира – топката повторно е на неговата страна.