Тетово – Призрен во фокусот на разговорите за инфраструктурна соработка со Косово

Вицепремиерот и министер за транспорт и врски, Александар Николоски, денес престојуваше во работна посета на Косово, заедно со заменик-министерката Калтрина Зеколи Шаќири и директорот на Јавното претпријатие за државни патишта, Коце Трајановски.

На покана на косовскиот министер за транспорт, Либурн Алиу, македонската делегација посети неколку значајни инфраструктурни проекти што се реализираат во Косово и разговараше за подобрување на сообраќајната поврзаност меѓу двете земји.

Една од клучните теми беше изградбата на патниот правец Тетово – Призрен, што би претставувал значаен инфраструктурен коридор меѓу Македонија и Косово. Покрај тоа, во разговорите беше вклучена и можноста за железничко поврзување Скопје – Приштина, со што би се олеснило патувањето и транспортот на стоки помеѓу двете земји.

Министерот Николоски нагласи дека подобрата инфраструктурна соработка со Косово ќе придонесе за економски раст, подобра регионална интеграција и олеснет транспорт за граѓаните и бизнисите од двете страни на границата.