Прогноза за времето: Променливо и нестабилно, но со сончеви моменти

Денеска не’ очекува променливо облачно време, со повремени сончеви периоди. Кон крајот на денот и во текот на ноќта се очекуваат локални врнежи од дожд, а можно е и ретки грмежи на одредени места. Ќе дува слаб до умерен ветер, а долж Повардарието повремено ќе биде и засилен, од југоисточен правец.

Температурите ќе се движат од 5 до 11 степени Целзиусови во утринските часови, додека дневните ќе достигнат од 19 до 23 степени.

Во Скопје, слично како и во остатокот од земјата – времето ќе биде променливо облачно со сонце во текот на денот, но кон вечерта се очекува дожд и можност за грмежи. Ќе дува умерен, а понекаде и засилен југоисточен ветер. Минималната температура ќе биде околу 10 степени, а максималната до 23 степени.

Според информации од УХМР, до петок ќе продолжи нестабилното време – со локални врнежи, можни поројни дождови, грмежи и засилен ветер. Добрата вест е што за време на викендот времето ќе се стабилизира – ќе биде сончево и топло, идеално за прошетка или излет.

Одредените сомневања изнесени во медиумите, дека јавниот обвинител Љупчо Коцевски со изјавите во телевизиско гостување за приведувањето на седуммина полициски службеници во Кочани, ја компромитирал акцијата, денеска од МВР излегоа со деманти.

-МВР во целост ги демантира дезинформациите објавени во дел од порталите за наводно нарушување на вчерашната акција од страна на јавниот обвинител Љупчо Коцевски. МВР при вчерашната акција постапуваше по насоки на јавното обвинителство, се вели во демантито на МВР.

Исчезнато лице од Тремник – семејството апелира за помош

Диме Стојамиров, 22-годишно момче од селото Тремник, Неготино, е исчезнат од вчера попладне, околу 14 часот. Според кажувањата на неговиот чичко Симе, Диме излегол од дома и се упатил во непознат правец. Неговото исчезнување веднаш било пријавено на бројот за итни случаи 112.

„Диме е лице со попреченост, но никогаш досега не се случило да не се врати толку долго. Излезе околу 14 часот, а штом забележавме дека го нема, веднаш алармиравме“, раскажува загрижениот чичко.

Синоќа беа вклучени и стручни екипи за потрага, со употреба на дрон, но засега без успех. Некои луѓе од околината рекле дека вчера попладне, помеѓу 15 и 16 часот, го виделе Диме како се движи по стариот пат кон селото Дисан. Не знаеле дека се води потрага, инаку би реагирале.

Семејството упатува апел до јавноста – доколку некој го забележи Диме, да се обиде да го задржи и веднаш да ја извести полицијата или чичкото Симе на бројот 075 570 354.

„Во минатото знаел да излезе сам, но никогаш за вака долго време. Не реагира кога ќе му се обратиш, па затоа е важно ако некој го види, да не го пушти сам, туку да повика некој од нас или полиција“, додава Симе.

Во моментот на исчезнувањето, Диме бил облечен во сива блуза, темно сини тренерки и влечки. Се движи полека, па се претпоставува дека не може да отишол многу далеку. Семејството е видно вознемирено, особено бидејќи не се знае каде ја поминал ноќта.

„Бараме помош од јавноста, секое споделување на фотографијата и информациите ни значи многу. Може да помине покрај некого, а ако не знаат дека го бараме, нема ни да реагираат. Ве молиме, помогнете“, апелира чичкото.

Доколку имате било каква информација, освен контактот со семејството, може да се јавите и директно во полиција.