Градоначалникот на Општина Чаир, Висар Ганиу, денеска имаше чест да пречека група талентирани ученици од основните училишта во општината, кои освоија прво, второ и трето место на општинскиот натпревар по математика. Овие ученици се дел од вкупно 48 ученици кои ќе го претставуваат Чаир на регионалниот натпревар што ќе се одржи на 15 март, каде што ќе се натпреваруваат со ученици од Општина Бутел и Чучер Сандево.

Ганиу им честиташе на учениците за нивниот успех и ги охрабри да продолжат со труд и самодоверба. Тој истакна дека Општина Чаир секогаш ќе биде нивна поддршка во образованието и ќе вложува во нивниот развој.

„Нивното знаење и успех се наша гордост, и ние ќе продолжиме да инвестираме во образованието и во иднината на нашите деца,“ истакна Ганиу, додавајќи дека општината ќе продолжи да создава услови за напредок на младите таленти.

Градоначалникот им посака многу успех на учениците во наредните натпревари, нагласувајќи дека тие се светол пример за иднината на Чаир.

Началник, се извинувам, нова фризура, не сме се виделе. Ве помешав со некој од правен сектор – се насмеа Славески.

Не стивнуваат реакциите на социјалните мрежи по објавената видео снимка од Советот на град Скопје во кое претседателот на Советот Трајко Славески не ја препозна градоначалничката Данела Арсовска, која се јави за збор.

Славески го повика следниот говорник, но не го препозна.

– Повелете, бара збор… сега не знам дали од правните… – рече Славески обраќајќи се на колешката

Како што Арсовска се доближуваше до говорницата, Славески ја препозна и ѝ се извини. Сите се насмеаја.

– Началник, се извинувам, нова фризура, не сме се виделе. Ве помешав со некој од правен сектор – се насмеа Славески.

– Нема проблем, претседателе… Па добро и правен сектор, не е лошо – додаде насмеаната Арсовска.

Видеото може да го погледнете тука

Во населбата Потстаница се одвиваат интензивни градежни активности за целосна реконструкција на објектот кој ќе биде првата детска градинка во овој дел од Кисела Вода. Станува збор за стар објект кој, со одлука на Владата на Република Македонија, беше правно преземен од ЈЗУ Завод за рехабилитација на деца и младинци – Скопје и даден на трајно користење на Општина Кисела Вода. Реконструкцијата опфаќа темелни зафати – од кровната конструкција, преку подните конструкции, до енергетски ефикасната фасада – со што ќе се создаде модерен и безбеден простор на 222 квадратни метри, за околу 80 дечиња.

Градоначалникот Орце Ѓорѓиевски истакна дека ова е значаен чекор за општината и додаде:

-Големо е значењето на оваа градинка кој за првпат ќе се отвори во Потстаница и која родителите од овој дел на општината со нетрпение ја очекуваат, како можност нивните деца да растат и да се развиваат во современи услови. Овој објект, кој со поддршка од Владата правно го презедовме од ЈЗУ “Завод за рехабилитација на деца и младинци” – Скопје, во моментов добива сосема нов лик. Темелната реконструкција што ја вршиме – од кровот, преку подните конструкции, до енергетски ефикасната фасада – ќе го претвори во модерен простор за околу 80 дечиња, каде што тие ќе можат безгрижно да растат и да се социјализираат.

Кога станав градоначалник, на листата на чекање за упис во градинка имаше околу 450 деца. Денес, тој број е сведeн на триесетина. Но, не застануваме тука – моментално активно работиме на изградба на уште две градинки: во Расадник и во „Верверичка“, во близина на Општината. Со оваа и со сите претходни инвестиции, во последниве три години работевме на изградба и проширување на вкупно девет градинки. Со завршувањето на градинките што се во изградба, целосно ќе ги затвориме овие листи. Ова е мојата стратегија како градоначалник – да обезбедиме во Кисела Вода да има место во градинка за секое дете!

Голема благодарност до премиерот Христијан Мицкоски за брзиот одговор и позитивниот пристап во процесот на отворање на оваа градинка. Ова е уште еден доказ дека кога ги споделуваме истите вредности и кога работиме заедно, можеме брзо и ефикасно да ги решаваме проблемите на граѓаните. Кисела Вода станува општина која вложува во децата, во семејствата и во иднината. Продолжуваме со истото темпо – градејќи, унапредувајќи и создавајќи подобри услови за сите-изјави градоначалникот Орце Ѓорѓиевски.