Претседателот на Фудбалската федерација на Македонија, Масар Омерагиќ, во „Куќа на фудбалот“ оствари значајна средба со легендите на македонскиот фудбал – Митко Стојковски, Тони Мицевски, Ванчо Мицевски и Сашо Здравевски.

Фокусот на разговорите беше насочен кон фудбалската состојба во Битола и регионот, развојот на младите таленти, како и иднината на ФК Пелистер. Посебно внимание беше посветено на стадионот „Тумбе кафе“, кој се разгледува како потенцијална база за младите македонски репрезентации.

Во соработка со градоначалникот на Битола, ОФС Битола и претседателот Златко Талевски, ФФМ активно работи на планот Битола и „Тумбе кафе“ да бидат домаќини на репрезентацијата на Македонија до 21 година.

Со вакви иницијативи и поддршка од легендите на македонскиот фудбал, минатото и сегашноста се обединуваат за градење на силна фудбалска иднина. Битола, како фудбалски град, со нетрпение го очекува големиот натпревар на 9 септември – Македонија против Италија.

Градоначалникот на општина Битола, Тони Коњановски, денеска изврши увид во градежните работи за реконструкција на поранешниот културен дом во населеното место Бистрица, кој ќе прерасне во современа спортска сала.

Објектот, кој со децении беше во руинирана состојба и надвор од функција, конечно ќе добие нов лик и мултифункционалност, исполнувајќи ги долгогодишните барања на жителите.

„После 41 година, оваа зграда повторно ќе заживее, обезбедувајќи простор за спортски и културни активности. Со овој проект создаваме нови можности за младите и го зајакнуваме животот во околните населени места. Инвестираме 37,6 милиони денари за да изградиме функционален и современ објект“, изјави Коњановски.

Проектот предвидува модернизација на објектот со нови конструктивни елементи и оптимална организација на просторот. Приземјето ќе биде наменето за спортски активности, а галеријата ќе остане како гледалиште за културни манифестации.

Реконструкцијата на салата во Бистрица е еден од приоритетните проекти на локалната самоуправа, кој ќе придонесе за развојот на спортот и културата во регионот.

Регулаторната комисија за енергетика, водни услуги и услуги за управување со комунален отпад на Република Македонија (РКЕ) ја информира јавноста дека (согласно Тарифниот систем за продажба на електрична енергија на потрошувачите кои ги снабдува универзалниот снабдувач и снабдувач во краен случај, член 10 став 8 ), сите домаќинства кои добиле сметки за електрична енергија и имаат за прв пат фактурирана потрошувачка во четврт блок, ЕВН Хоум е должен да ги корегира сметките за електрична енергија и да направи соодветна распределба по блокови согласно историјатот на просечната потрошувачка на домаќинството во последните 3 пресметковни периоди.

Потрошувачите кои се незадоволни од пресметката на потрошената енергија и износот на сметката, (согласно член 37 од Законот за енергетика*, Правилата за снабдување со електрична енергија и Правилата за постапување на приговори и разрешување на спорови, потрошувачите за секоја фактура) имаат право да вложат приговор до универзалниот снабдувач ЕВН Хоум.

Доколку потрошувачот не е задоволен од добиениот одговор или не добијат одговор во законски предвидениот рок (од 8 дена), имаат право да поднесат приговор до РКЕ како второстепен орган. За приговорот до РКЕ нема пропишано посебна форма/формулар и кон истиот треба да приложат: копија од вложениот приговор до ЕВН Хоум, одговорот од ЕВН Хоум и копија од сметката по која приговараат.

Приговорот може да се достави во архивата на РКЕ или електронски по е-маил на erc@erc.org.mk и potrosuvaci@erc.org.mk .

Против решенијата на РКЕ незадоволната странка може да поведе Управен спор.

Од 1 јануари 2025 година цената на струјата за просечна потрошувачка во сите четири блокови е зголемена за помалку од еден процент (0,92 %). Конкретно во прв блок цената е зголемена за 0,68%, додека во втор блок цената е зголемена за 0,90 %

Регулаторната комисија за енергетика, водни услуги и услуги за управување со комунален отпад ги повикува политичките партии да не ги политизираат одлуките на РКЕ кое е независно тело.