Скопје

Ѓорѓиевски: Општокорисната работа како решение за малолетничкиот вандализам

Претседателот на ЗЕЛС и градоначалник на Кисела Вода, Орце Ѓорѓиевски, ја истакна поддршката за иницијативата за воведување општокорисна работа како мерка за малолетни сторители на вандализам.

На последната седница на Управниот одбор на ЗЕЛС, оваа иницијатива, предложена од градоначалникот на Центар, Горан Герасимовски, беше едногласно прифатена и официјално доставена до Владата.

„Вандализмот и уништувањето на јавните добра се сериозен проблем кој бара системско решение. Наместо само санкции, потребни се и превентивни мерки кои ќе овозможат ресоцијализација на младите“, истакна Ѓорѓиевски.

Иницијативата предвидува измени во неколку закони, меѓу кои Законот за прекршочна постапка, Законот за пробација и Законот за правда за децата, со цел општокорисната работа да стане алтернативна мерка за малолетните сторители. Дополнително, се предлага разгледување измени во Законот за семејство и Законот за извршување на санкции, со што би се вклучила и одговорноста на родителите преку можност за заедничка општокорисна работа.

„Нашата цел не е само да казнуваме, туку да создадеме механизми кои ќе спречат вакви појави во иднина. Сакаме да ја подигнеме свеста кај младите за значењето на јавните добра и да им дадеме можност да се коригираат низ активности што ќе бидат од корист за заедницата“, додаде Ѓорѓиевски.

Во рамки на иницијативата се предлага формирање на стручна работна група составена од претставници на Владата, ресорните министерства, центрите за социјална работа, училиштата и невладините организации. Оваа група ќе има задача да подготви конкретни законски измени кои ќе ја зајакнат правната рамка за справување со малолетничкиот вандализам.

„Општокорисната работа има двоен ефект: им помага на младите да развијат чувство на одговорност и почит кон заедницата, а истовремено спречува повторување на ваквите негативни појави“, заклучи Ѓорѓиевски.

ЗЕЛС очекува Владата и надлежните институции да ја поддржат оваа иницијатива со цел создавање побезбедни и поуредени локални заедници.

Скопје

Секое застанување на булевар на „пет минути“ ќе се санкционира, вели Топаловски

Началникот на СВР Скопје, Сашо Топаловски, најави засилена контрола на паркирањето во главниот град. Во гостување во емисијата „Претрес“, тој појасни дека полициски возила опремени со камери, поврзани директно со системот „Безбеден град“, ќе патролираат по Скопје.

Секое застанување на булеварите каде што не е дозволено „паркирање на пет минути“ ќе биде санкционирано. „За несоодветно паркираните возила на паркиралиштата и булеварите… сите кои ќе помислат дека може да ја остават колата и да завршат некоја работа, создавајќи гужва на сообраќајницата, сега ќе бидат казнети. Колите ќе вртат по цел ден, на различни локации. Пораката до оние што планираат да бидат сообраќајни прекршители е дека тоа нема да биде исплатливо“, рече Топаловски.

СВР Скопје со оваа мерка најавува поголема дисциплина на булеварите и намалување на сообраќајниот метеж во градот.

Скопје

По „Димо Хаџи Димов“, ешерихија коли и по втор пат пронајдена во училишни намази

Агенцијата за храна и ветеринарство (АХВ) изрече парични казни против операторот со храна кој стопанисува со кујните во основните училишта во Општина Карпош, откако лабораториските анализи потврдија небезбедна храна во две училишта.

По неодамнешната вонредна инспекција, АХВ официјално ги доби резултатите од тестирањата на мострите храна и брисевите земени од кујната во ОУ „Димо Хаџи Димов“.

Лабораториските наоди потврдија дека послужената мусака не ги задоволува микробиолошките критериуми, при што е утврдено присуство на бактеријата Enterobacteriaceae.

Поради овој пропуст, операторот со храна е казнет со 600 евра, а одговорното лице со 300 евра во денарска противвредност.

По првичната инспекција и наредбата за генерално чистење и дезинфекција, кујната во „Димо Хаџи Димов“ останува затворена сѐ додека не се добијат нови лабораториски наоди од повторно земените брисеви, со кои треба да се потврди нејзината безбедност. Дополнително, сите вработени се упатени на вонредни здравствени санитарни прегледи.

Во рамки на превентивните вонредни контроли, АХВ изврши инспекција и во кујните на уште девет основни училишта во Карпош, со кои стопанисува истиот оператор.

При овие контроли, кај една мостра храна (намаз) е утврдено присуство на бактерија ешерихија коли, за што веднаш е наредено намазот да се исфрли од употреба. Иако два од тестираните брисеви беа позитивни, кај нив не е утврдено присуство на патогени бактерии.

За недоследностите утврдени при превентивните контроли во деветте училишта, операторот е казнет со уште две парични казни од по 900 евра (600 евра за операторот и 300 евра за одговорното лице).

Вкупна казна од 650 евра е изречена и за дополнителни пропусти, вклучувајќи:

Непоседување сертификат за завршен курс по хигиена за едно вработено лице.
Немање соодветни технички услови за работа (недостаток на топла вода) во две училишни кујни.

АХВ продолжува со засилени контроли за да обезбеди сигурност и здравствена безбедност на оброците на учениците.

Скопје

Меџити: Инклузијата на лицата со посебни потреби е заедничка одговорност

По повод 3 Декември, Меѓународниот ден на лицата со попреченост, градоначалникот на Општина Чаир, Изет Меџити, учествуваше на инаугурацијата на организацијата „INKLUDIVERSA“. Иницијативата има за цел создавање повеќе пристапни и поддржувачки простори за сите граѓани.

Меџити истакна дека заедницата има обврска да обезбеди инклузија и зајакнување на лицата со посебни потреби, со можности за еднаков развој на нивниот потенцијал.

– Општина Чаир секојдневно се залага за создавање на опкружување каде што децата и младите со посебни потреби ќе добиваат поддршка, грижа и реални можности за интеграција во сите сфери на животот – рече Меџити.