Македонија

Барањата САД да ја сменат политиката кон Македонија во првиот мандат на Трамп не успеале поради „бескорисните“ секретари Тилерсон и Помпео

Поранешна претставничка на американскиот Стејт Департмент говореше во една од најгледаните десничарски емисии во САД за тоа како во првиот мандат на претседателот Доналд Трамп, Македонија барала да запре американската поддршка за Шарената Револуција, но поради „бескорисноста“ на тогашното раководство, до тоа не дошло.

Катерин О’Нил Гилиган е поранешна функционерка во Стејт Департментот и во УСАИД која беше гостинка во емисијата на Тим Пул, каде се дискутираше за злоупотребите на американската дипломатија во мандатот на претседателот Обама. Според Гилиган, и во првиот мандат на Трамп имало барања да се укине УСАИД и да се запре политичкото мешање на американските дипломати во странски држави, при што таа конкретно имала средби со македонски претставници, но поради отпорот во затекнатата администрација и неснаоѓањето на државните секретари на Трамп Рекс Тилерсон и Мајк Помпео, плановите за реформи во првиот мандат на Трамп не се оствариле.

Се сеќавам, имавме луѓе од Македонија кои бараа да ја запреме нашата влада и нејзините обиди да ја урне нивната влада. За жал, бевме пренатрупани со работа, немавме никаква поддршка од горе. Тилерсон беше отпуштен прилично рано во мандатот. Помпео беше бескорисен. Затоа не можевме да сториме ништо, изјави Гилиган.

Американската поддршка за Шарената револуција почна во мандатот на претседателот Обама, а и покрај очекувањата дека претседателот Трамп ќе реагира во случаите каде американските дипломати поттикнуваа уривање на десно ориентирани влади низ светот, до тоа не дојде. Трамп започнаа со темелно размонтирање на организацијата УСАИД, преку која се спроведуваа програми за мешање во политичките прашања на странски држави, како приоритет уште на почетокот на својот втор мандат.

Видеото може да го погледнете тука

Македонија

ВЛЕН: По 24 години конечно закон за правично застепеност

Коалицијата ВЛЕН го поздравува позитивното мислење на Комисијата на Венеција за Законот за правично и соодветно застапување, кој беше претставен од заменик-премиерот Арбен Фетаи, со што се дава зелено светло за процесот што ја затвора 24-годишната чекање.

Овој закон е доказ дека кога постои политичка волја, принципот на правично застапување не останува само на зборови, туку се претвора во закон. Правичното застапување се движи напред, базирано на европски стандарди и принципот на меритократија.

ВЛЕН е решен ова прашање да не остане повеќе предмет на политички игри, туку да добие целосно законско решение, за професионална, функционална и инклузивна јавна администрација за сите заедници.

За 24 години ова прашање се користеше за реторика и политички калкулации, без да се постигне законско решение. Денес, ВЛЕН го затвора овој период, претворајќи го правичното застапување во закон.

Македонија

Седум од десет Македонци против покачување на платите на судиите и обвинителите

Според последното истражување на јавното мислење на порталот МКД.мк, спроведено од агенцијата Маркет Вижн, македонските граѓани се изразито против покачување на платите на судиите и јавните обвинители.

Одговорите покажуваат дека 73,6 отсто од испитаниците сметаат дека судиите и обвинителите не заслужуваат зголемување на нивните месечни примања, додека само 14,8 отсто сметаат дека повисоките плати се оправдани. Најголем дел од граѓаните оценуваат дека покачувањето на платите нема да придонесе за подобрување на состојбата во македонското правосудство.

Истражувањето било спроведено од 25 ноември до 6 декември 2025 година со CAТI метод – телефонско анкетирање со помош на компјутер, на примерок од 1.200 испитаници.

Резултатите ја потврдуваат недовербата на граѓаните кон правосудниот систем и укажуваат на потребата од реформи и зголемена одговорност во судството.

Македонија

Детонации на Криволак: се уништуваат експлозиви запленети пред 15 години

Полициски службеници од Одделот за криминалистичка полиција – Единица за недозволена трговија со оружје, опасни материи и радиоактивен материјал, во координација со Единицата за откривање и демонтирање на експлозивни средства при Одделот за сузбивање на организиран и сериозен криминал, согласно однапред изготвен план, преземаат мерки и активности за уништување на голема количина минско-експлозивни средства.

Минско-експлозивните средства, кои биле запленети пред цели 15 години и складирани во касарната „Ѓорче Петров“, денеска се транспортираат до армискиот полигон „Криволак“ со товарни возила на АРМ. Уништувањето ќе се спроведе во присуство на Комисијата за уништување на оружје, делови и компоненти на оружје, муниција и експлозивен материјал.

Процесот на уништување ќе го реализираат полициски службеници од Единицата за откривање и демонтирање на експлозивни средства и направи, стручни лица од Армијата на Република Северна Македонија и пиротехничари од Дирекцијата за заштита и спасување, преку контролирана детонација.

Фактот што станува збор за прво уништување на ваков тип минско-експлозивни средства по цели 15 години укажува дека безбедносните ризици во минатото не биле третирани со потребната сериозност. Денешната активност претставува јасен сигнал дека со одговорен пристап, зголемена посветеност и професионално раководење, безбедноста на граѓаните конечно се става на ниво кое одамна било неопходно.