Американските Федерални Резерви (ФЕД) уште еднаш изненадија со своето последно монетарно поместување, трет пат по ред гласајќи за намалување на клучната каматна стапка. Ова е продолжение на нивната мисија да го заштитат пазарот на трудот од било какви потреси, но одлуката не помина без остри несогласувања меѓу клучните банкарски претставници.

Мнозинството членови на Федералните Резерви одлучија да ја намалат референтната стапка за четвртина процентен поен, поставувајќи ја во нов опсег од 3,5 до 3,75 проценти – најниско ниво во повеќе од три години.

Според извештаите на CNN, овогодинешниот сериски потег на намалување на стапките е директен одговор на сѐ појасните сигнали за слабеење на пазарот на трудот, каде растот на вработеноста е невообичаено бавен. Федералните Резерви очигледно се подготвени да ризикуваат со инфлацијата, само за да избегнат евентуална криза на работните места.

Овој месечен состанок за монетарна политика беше исклучително контроверзен. Три клучни фигури во Федералните Резерви отворено гласаа против одлуката на мнозинството. Нивниот главен аргумент: приоритет мора да биде борбата против зголемените трошоци за живот, односно намалувањето на стапките треба да се одложи сѐ додека инфлацијата не се стави под контрола.

И покрај оваа серија на намалувања, Федералните Резерви во своите новообјавени квартални проекции предвидува само едно дополнително намалување на каматните стапки следната година. Сепак, како што е вообичаено во економијата, оваа проекција е поставена на стаклени нозе и може да се промени во зависност од економските индикатори.

Министерката за финансии Гордана Димитриеска-Кочоска денеска и утре ќе учествува на Истанбулскиот економски самит 2025.

На Самитот ќе учествуваат високи претставници на влади, меѓународни организации, како и претставници од деловниот сектор и академската заедница.

Министерката на отворањето ќе има воведно обраќање на тема „Нова рамнотежа и глобална соработка“, во кое ќе ги потенцира актуелните предизвици на светската економија и значењето на градењето силни и отпорни економски врски.

Утре Димитриеска-Кочоска ќе се обрати на панел-дискусијата „Нови текови на глобалните финансии: нова рамнотежа, дигитални валути и економски партнерства“, посветена на иднината на финансиските системи, растечката улога на дигиталните валути и развојот на економски партнерства помеѓу државите.

-Фокусот на Самитот е насочен кон економски политики за одржлив раст, јакнење на економската соработка помеѓу државите и развој на нови партнерства.

На него ќе се дискутира за глобалната економија, одржливиот развој и зелената економија, енергетиката и финансиите, дигиталната трансформација, како и за улогата на образованието во привлекувањето странски инвестиции.

Учеството на министерката ќе овозможи размена на искуства со водечките економски и политички чинители на глобално ниво, наведува Министерството за финансии

Американското Министерство за финансии го продолжи крајниот рок за „Лукоил“. Компанијата доби продолжување на лиценцата до 17 јануари, што ѝ овозможува да преговара и склучува клучни, условни договори за продажба на нејзините средства лоцирани во странство.

Според објавата на веб-страницата на Канцеларијата за контрола на странски средства (OFAC), оваа лиценца не е само за продажба. Таа дозволува и спроведување на трансакции неопходни за одржување на тековните деловни операции, се разбира, со одобрение од OFAC.

Сепак, времето поминува. Заинтересираните страни кои сакаат да ја искористат оваа лиценца имаат строга обврска: да купат 50 проценти или повеќе од странските средства на „Лукоил“ најдоцна до 17 јануари 2026 година. Овој договор, се разбира, мора да добие зелено светло од OFAC за да биде валиден.

OFAC појаснува што всушност подразбира терминот „условни договори“: од извршни проформа фактури и принципиелни договори, до обврзувачки меморандуми за разбирање или какви било слични договорени документи, па дури и понуди како одговор на јавни тендери.

И покрај проширените можности за странските средства, беше нагласено дека лиценцата строго забранува трансфер на пари на кое било физичко или правно лице во Русија.