Учениците од средното медицинско училиште ОСМУ „Никола Штејн“ – Тетово организираа хуманитарна акција за собирање парични средства во знак на поддршка за семејствата кои ги загубија своите најблиски во трагичниот настан што ја потресе Македонија.

Во големата трагедија во Кочани, во која животот го загубија 59 млади, а повеќе од 150 беа повредени, целата држава е во тага. Во овие тешки моменти, младите од Тетово, без разлика на нивната етничка припадност, покажаа дека хуманоста е над сите разлики. Учениците, Македонци и Албанци заедно донираа средства, испраќајќи порака за солидарност и единство.

„Говориме различен јазик, но плачеме исто…“ – со овие зборови учениците денес го објавија и своето видео, кое ја пренесува пораката за заедништво и поддршка во време на голема болка.

По повод Денот на крводарителството и денот на основањето на Црвен крст во Република Македонија, во организација на ОО Црвен крст, денес во Битола се одржа традиционална крводарителска акција. Акцијата беше успешно спроведена и привлече голем интерес меѓу граѓаните.

Градоначалникот на Битола, Тони Коњановски, истакна важноста на оваа хумана активност, која секоја година го збогатува градот со солидарност и поддршка за оние кои најмногу ја имаат потребата од крв. „Ова е уште еден пример на нашата посветеност кон заедницата и покажувањето на одговорност во моментите на потреба“, рече Коњановски.

Центарот за трансфузиона медицина од Битола потврди дека акцијата е успешно спроведена и ги нагласи бројот на дарувани единици крв, што ќе помогне во спроведувањето на медицинските третмани и спасувањето на животи.

Изградбата на планинарскиот дом „Копанки“ добива нова динамика, а Општина Битола останува посветена на неговото завршување и ставање во функција. Ова беше тема на средбата меѓу градоначалникот на Битола, Тони Коњановски, и претседателот на ПСК „Пелистер“, Диме Попов.

Според Попов, поради сериозните последици од пожарот, домот не можеше да биде реконструиран, туку се гради како сосема нов објект. Новата градба го задржува автентичниот изглед и значењето што „Копанки“ го има за битолчани. Во моментов, објектот е изграден до карабина, се работи на кровната конструкција и скалите, а следна фаза ќе биде поставувањето на дограмата.

Локалната самоуправа досега издвоила 9.800.000 денари за изградбата, а оваа година, според програмата за спорт и млади, ќе обезбеди дополнителни 2.800.000 денари.