Претседателката на Република Македонија, Гордана Сиљановска Давкова, оствари средба со младите балерини од балетското училиште „Булфрогс Балет“, како и со неговата уметничка директорка и основачка, Александра Никифоровски.
На средбата, таа беше запознаена со успесите на ова уникатно интернационално приватно балетско училиште, кое со посветеност и професионализам создава квалитетни млади уметници. Голем повод за гордост е нивниот изборен пласман во финалето на Младинското американско Гран-при, кое ќе се одржи во април годинава во Тампа, Флорида. Ова е исклучителен успех за македонскиот балет, бидејќи станува збор за најголемиот балетски натпревар во светот и еден од трите најпрестижни глобални натпревари.
Претседателката Сиљановска Давкова изрази надеж дека ќе се најде решение за овие 18 талентирани балерини да ја претставуваат Македонија со својата изведба на „Сон на летната ноќ“. Таа нагласи дека оваа шанса не смее да се пропушти и дека учеството на ваква сцена ќе биде огромен чекор за нивната кариера и афирмација на македонската балетска уметност.
На средбата се разговараше и за пошироките предизвици на македонската и светската балетска сцена, за значењето на уметноста во физичкиот и емоционалниот развој на младите, како и за нивната успешна интеграција во општеството преку културата.
Сиљановска Давкова им вети поддршка и најави дека наскоро ќе биде организиран настан во Македонија, каде што овие талентирани балерини ќе можат да го претстават својот талент пред домашната публика.
„Со нетрпение очекувам да ги гледаме на сцена, горди на нивниот успех и талент“, порача претседателката.
