Претседателката Гордана Сиљановска – Давкова денеска прими делегација на Сојузната здружена команда на НАТО во Неапол, предводена од адмирал Стјуарт Манч, кој со своите колеги престојува во земјава по повод 5 –годишнината од членството на нашата држава во НАТО. На средбата присуствуваше и амбасадорката на САД, Анџела Агелер, информира кабинетот на претседателката на Македонија.

Истакнувајќи ја својата благодарност за нивното присуство на значаен јубилеј за државата, претседателката Сиљановска – Давкова на средбата истакнала дека од двете стратешки цели за кои постоеше консензус, првата – НАТО е реалност, а не гледа причина и втората – ЕУ да не се оствари.

,,И во овој тежок и тажен период низ којшто поминуваат македонските граѓани, за нас беше многу важно да знаеме дека не сме сами и дека нашите пријатели, меѓу кои и НАТО, и во најтешките моменти се со нас”, порачала Сиљановска Давкова на средбата.

Изразувајќи сочувство за огромната загуба во трагедијата во Кочани, адмиралот Манч рекол дека државата, но и сите други земји коишто помагаат ја препознале важноста од брз одговор на кризата.

Соговорниците се заложиле за понатамошна соработка во рамките на Алијансата при што адмиралот Манч се заблагодарил за македонскиот придонес во бројните мировни мисии, со коишто македонската армија се здобила со заслужен респект.

Претседателката изразила подготвеност македонската Армија и понатаму да биде дел од НАТО мисиите заради придонес во зачувувањето на регионалната, но и глобалната безбедност. 

На средбата станало збор и за состојбите на Балканот и обајцата се согласиле дека регионот и понатаму се соочува со бројни безбедносни предизвици, особено врзани за спорот меѓу Косово и Србија, како и состојбата во Република Српска, односно Босна и Херцеговина.

Посочувајќи дека НАТО останува посветен на одржување на безбедноста на регионот, адмиралот Манч, на крајот истакнал дека безбедносните предизвици полесно ќе се надминат ако во нивното решавање заедно учествуваат Алијансата и Европската Унија, се вели во соопштението од кабинетот на претседателката.

Еден ден откако побара истражна комисија со меѓународен надзор за трагедијата во Кочани, ДУИ сега бара вклучување на правни експерти од Европската комисија. Велат дека премиерот го заробил правосудниот систем, а изненадувачки, министерот за внатрешни работи не е вклучен во групата на виновници.

„Ја повикуваме Европската комисија веднаш да испрати правни експерти и директно да се вклучи во засилен мониторинг на овој случај, а потоа со својата експертиза и сознанија ќе и помогне на парламентарната комисија, која треба да се формира веднаш под меѓународен надзор. Демократијата, владеењето на правото и почитувањето на основните човекови права се основните правила и принципи на Европската унија, а тие мора да бидат заштитени и во Северна Македонија“, велат од ДУИ.

ВЛЕН вели дека ДУИ бара комисии за да се сокрие вистината, а не да се открие. Од владејачката партија велат дека доколку се формира комисија би ги истражила сите трагедии во последните години.

„ДУИ, по 22 години власт и уништување на правосудниот систем, денес се обидува да ја игра улогата на жртва, барајќи истрага само за трагедијата во Кочани. Но, граѓаните не забораваат: Кој го создаде овој трул систем? Кој ги заштити криминалците? Кој ги претвори судовите и обвинителството во приватни партиски канцеларии? ВЛЕН нема да дозволи да се манипулира со вистината! Бараме истражна комисија за сите трагедии во последните години – од Ласкарце, модуларната болница, Беса Транс, до Кочани. Нема да дозволиме ДУИ да одлучува кои жртви заслужуваат правда, а кои треба да се заборават!”, рекоа од ВЛЕН.

Според правилникот на Собранието, анкетната комисија ја формира Собранието на предлог на пратениците, а нејзиниот претседател го предлага опозицијата. Ваквите комисии можат да даваат препораки, но и да помагаат во истраги или процеси, додека препораките што ги даваат комисиите не се обврзувачки за истражните органи. ДУИ презеде иницијатива за формирање истражна комисија за смртта на 4-годишниот Алмир од Куманово, но Бобан Илиќ беше осуден на само 4 години затвор. Од ДУИ најавија истражна комисија за Дива населба, но таа никогаш не беше формирана.

За време на 22-годишното владеење на ДУИ, за случаите „Сопот“ и „Монструм“ беа формирани парламентарни комисии кои требаше да го расветлат евентуалното местење на случајот, но тоа никогаш не се случи во Собранието. Неодамна беше формирана комисија за случајот „Онкологија“, односно скандалот со препродажбата на лекови за болните од рак, но се уште без резултати.

Алсат

Прво мора да се формира парламентарна комисија со меѓународен надзор, а потоа да се размислува за други чекори, велат од Демократската унија за интеграција (ДУИ) за МИА во врска најавата на лидерот на СДСМ Венко Филипче за лидерска средба.

-Затоа, ги повикуваме сите пратеници кои не сакаат една од најголемите трагедии во државата да заврши со најголемата правна фарса на селективна правда и заробување на државата, денеска да ја потпишат иницијативата на „Европскиот фронт“ за формирање на оваа комисија, посочуваат од ДУИ.

Филипче синоќа на Донаторската вечер за помош на семејствата на настраданите и повредените во пожарот во Кочани најави дека идната недела во Собранието ќе ги повика на средба лидерите на најголемите политички партии на кои ќе им го презентира неговиот план – што тој смета дека е обврска да се направи за државата бидејќи, рече, „очигледно е дека конвенционалните начини на водење на политика, на политичка борба, не даваат доволно брзо резултати“.

Пратеничката група на „Европскиот фронт“ вчера поднесе формално барање до претседателот на Собранието за информација за деталите и околностите, постапките на надлежните институции и селективниот пристап во истражувачкиот процес поврзан со трагедијата што се случи во Кочани, каде загинаа 59 лица и стотици други беа повредени, соопштија од пратеничката група. Исто така тие бараат и собраниска Комисија да ја набљудува работата на истражните и правосудните органи во врска со пожарот во Кочани.

-Барањето се базира на член 205, став 2 од Деловникот на Собранието на Република Македонија и вклучува неколку клучни точки кои бараат објаснување од Владата, Министерството за внатрешни работи, Јавното обвинителство и други институции, меѓу кои се: инспекциски проверки и превентивни мерки – мерки преземени пред трагедијата, постапки на органите за ред и итни случаи – дејствија во денот на настанот, детали за истрагата и нејзината транспарентност – како е спроведена истрагата и зошто постои селективен пристап, селективниот пристап во истрагата – објаснување на фокусирањето само на определени функционери и мерките за обезбедување независна и транспарентна истрага – преземени активности за гарантирање на правдата, наведуваат од „Европскиот фронт“.