Спорт

Фудбалскиот клуб „Preston Lions FC“ пререгистриран во „Preston Macedonia FC“ – Австралија го одобри името, грчката заедница реагира

Мелбурн, 13 февруари 2025 – Австралиската владина агенција за интелектуална сопственост (IP Australia) официјално го регистрира името „Preston Makedonia S.C.“ како ново име на фудбалскиот клуб Preston Lions FC, кој настапува во NPL Victoria. Оваа одлука предизвика реакции во грчката заедница во Австралија, која смета дека употребата на терминот „Македонија“ во овој контекст е спорна.

Грчката заедница реагира

Истакнатиот претставник на грчката заедница во Австралија, Сем Костулиас, побара објаснување од IP Australia, тврдејќи дека Договорот од Преспа не дозволува употреба на зборот „Македонија“ како трговска марка, ниту користење на Сонцето од Вергина во амблемите.

Во официјалниот одговор, Блејк Ноулс, директор за трговски марки и заменик-регистратор за трговски марки во IP Australia, појасни дека Австралија го почитува и спроведува Договорот од Преспа, но дека овој случај не потпаѓа под неговите одредби.

„Употребата на терминот ‘Македонија’ во контекст на трговските марки не претставува расна или културно навредлива порака, ниту е иредентистичка. Таа е исклучиво поврзана со културното наследство на апликантот“, стои во официјалниот одговор.

Ноулс додаде дека истражувањата покажале оти терминот „македонски“ се користи од повеќе организации во Австралија кои ги претставуваат граѓаните со северномакедонско потекло, и дека преференциите на одредени заедници не можат да бидат основа за спречување на регистрација.

Македонската заедница ја поздравува одлуката

Одлуката на IP Australia беше пречекана со задоволство во македонската заедница во Австралија, која ја оцени како потврда за правото на самоопределување и самоидентификација. Македонците во Австралија потенцираат дека се австралиски државјани со еднакви права и дека никој не смее да ги ограничува во изразувањето на нивниот идентитет.

Натамошни чекори на грчката амбасада

Грчката заедница во Австралија побара од грчката амбасада да преземе понатамошни чекори за оспорување на одлуката. Сепак, според правните експерти, шансите за поништување на регистрацијата се минимални, бидејќи IP Australia веќе донесе правосилна одлука.

Поддршка од Светскиот Македонски Конгрес

По објавата на пререгистрацијата, Светскиот Македонски Конгрес (СМК) ја поздрави одлуката и испрати честитки до раководството и навивачите на клубот.

„Preston Macedonia FC“ останува симбол на македонскиот спортски дух во Австралија и ќе продолжи да ги брани боите на Македонија на фудбалските терени“, стои во соопштението на СМК.

Фудбалскиот клуб и неговите навивачи порачаа дека ќе продолжат да го поддржуваат својот тим и ќе се стремат кон нови спортски успеси.

Спорт

КОНКУРС за идејно решение за изработка на пехар за шампион на Македонија во ПРВА МФЛ

Фудбалската федерација на Македонија распишува конкурс за избор на најдобро идејно решение за новиот пехар наменет за шампионот на Македонија во Првата фудбалска лига.

Целта на конкурсот е да се изработи современо, препознатливо и автентично уметничко решение кое ќе ја симболизира традицијата, енергијата и победничкиот дух на македонскиот фудбал.

Право на учество:

Право на учество имаат: академски уметници, дизајнери, студенти на ликовни академии, архитекти, скулптори и други лица со креативен визуелен израз.

Секој учесник може да конкурира со најмногу три идејни решенија.

Учесниците треба да достават:

Кратко образложение за концептот на пехарот.

Визуелна презентација: скица, 3D рендер, технички цртеж или макета (фотографии).

Предлог материјали, висина и форма на пехарот.

Контакт информации.

Критериуми за избор

Креативност и оригиналност

Препознатлив македонски визуелен идентитет

Функционалност и издржливост

Можност за реализација

Естетика и симболика

Рок и начин на доставување

Идејните решенија се доставуваат електронски на:ffm@ffm.com.mk или во архивата на ФФМ (бул. АСНОМ 21) најдоцна до 15. март 2026.

Спорт

ПСЖ и Фламенго во финалето за Интерконтиненталниот куп

Вечерва во 18:00 часот, на стадионот „Ал Рајан“ во Катар, во големото финале на Интерконтиненталниот куп, силите ќе ги одмерат Пари Сен Жермен и Фламенго. Французите го бркаат својот прв светски трофеј во историјата, додека Бразилците сакаат да се вратат на тронот по пауза од цели 44 години.

Тимот на Луис Енрике пристигнува во Доха со амбиција конечно да ја круниса својата европска доминација со глобален печат. Како актуелни шампиони на Европа, ПСЖ имаа привилегија на директен билет за финалето, но патот до овој момент не беше без трње. Се уште се под впечаток од летниот пораз од Челзи (0:3) во финалето на Светското клупско првенство, а притисокот е зголемен и поради неизвесната трка во домашното првенство каде Ленс им дише во врат.

Сепак, токму во Катар започна нивната златна серија со триумфот над Монако, а со враќањето на Усман Дембеле и голманот Лукас Шевалие, Енрике верува дека ќе успее да го земе трофејот. Единствен голем хендикеп останува отсуството на брзоногиот Ашраф Хакими.

Од другата страна стои „црвено-црната“ лавина од Рио де Женеиро. Фламенго преживува ренесанса под палката на Филипе Луис. Откако во само седум дена ги покорија Бразил и Јужна Америка (Копа Либертадорес), сега нивниот нишан е насочен кон светот.

Навивачите на Фламенго со децении го прераскажуваат митот за 1981 година и лекцијата одржана на Ливерпул (3:0). Денешниот тим, предводен со тактичката дисциплина, сака да го повтори тој подвиг. Иако настапот на голгетерот Педро е под знак прашалник, Фламенго покажа дека знае како со европските гиганти, потсетувајќи на неодамнешната победа над Челзи (3:1).

Спорт

Бразилецот Да Силва потпиша за Вардар – новитет во редовите на скопскиот гигант

Ракометниот клуб Вардар повлече значаен стратешки потег во пресрет на клучниот дел од сезоната. Жоао Педро да Силва (30) е новиот бек на линијата на „вардарци“. Неговиот ангажман, кој ќе трае две и пол сезони, е потврда за долгорочната визија на управата за враќање на врвот.

Стручниот штаб во Да Силва гледа профил на играч кој носи брзина, интелигентни решенија и потребна разновидност во офанзивата. Со оглед на тешките предизвици во Лига Европа кои следуваат во февруари и март, како и домашниот плеј-оф, Бразилецот доаѓа како клучно засилување во вистински момент. Неговата промоција во Скопје е закажана за почетокот на идната година, кога ќе бидат финализирани и последните детали од соработката.