Netflix ќе го купи филмскиот и стриминг-секторот на Warner Bros Discovery за 72 милијарди долари, пренесува BBC. Со оваа мегазделка, која ги опфаќа франшизите „Хари Потер“ и „Игра на тронови“, како и платформата HBO Max, американската медиумска индустрија се соочува со најголемата трансформација во последната деценија.

Според извештаите, Netflix поднел највисока понуда – 28 долари по акција, надминувајќи ги Comcaste и Paramount Skydance. Paramount претходно понуди 24 долари по акција за преземање на целата компанија, вклучително и кабелските мрежи како CNN, но Warner Bros ја одби понудата. Новата понуда на Paramount, блиску до 27 долари по акција, дојде заедно со остри критики дека процесот на продажба е „скроен“ во корист на Netflix.

Експертите предупредуваат дека зделката ќе се соочи со сериозни предизвици од американските регулатори за пазарна конкуренција. Аналитичарката Ема Вол објаснува дека Netflix купува само делови од бизнисот што функционираат добро, за разлика од Paramount, чии понуди опфаќаа и „непрофитабилни сегменти“. Според неа, обвинувањата на Paramount кон Warner Bros ја ослабуваат нивната позиција: „Ако се карате за процесот, всушност ја поткопувате сопствената понуда“.

Доколку биде одобрена, аквизицијата би имала големи последици за Холивуд. Том Харингтон од „Ендерс Анализа“ вели дека спојувањето би предизвикало промена на индустриската динамика, бидејќи Netflix – платформа што минимално се потпира на кино-прикажување – ќе преземе бренд кој традиционално се темели на филмската продукција. Тој очекува значителни кратења во производството, што би можело да предизвика незадоволство кај синдикатите. Особено ранлива, според него, би била HBO, „креативниот бисер“ на Warner Bros.

За гледачите, последиците веројатно ќе се почувствуваат преку повисоки претплати. Харингтон предвидува дека Netflix ќе стане уште поскап, а со евентуално затворање или сведување на HBO Max, платформата ќе го зацврсти доминантното место на пазарот.

Најголемиот европски музички спектакл е погоден од невидена политичка бура, која ја доведува во прашање неговата иднина. Откако Европската радиодифузна унија (ЕБУ) му даде „зелено светло“ на Израел да настапи во 2026 година, четири земји – Ирска, Шпанија, Холандија и Словенија – официјално објавија бојкот на натпреварот!

Одлуката беше донесена на Генералното собрание на ЕБУ, каде што членките не гласаа за исклучување на Израел, туку усвоија нов пакет правила за наводна „заштита на интегритетот и неутралноста“ на натпреварот. Овој маневар, кој практично го задржа Израел во игра, го предизвика гневот на неколку јавни сервиси.

Ирска (рекордерот по победи!), шпанската РТVE, холандскиот Авротрос и словенечкиот РТВСЛО го спроведуваат своето претходно ветување. Тие едногласно сметаат дека учеството на Израел, во услови на војна во Газа и хуманитарна катастрофа, е некомпатибилно со мисијата и јавните вредности на медиумите!

Холандија се огласи за нејзиното учество на Евровизија: „во сегашните околности е некомпатибилно со јавните вредности што се важни за нас“. Шпанија оди до крај, РТVE не само што се повлекува, туку најавува дека нема да ги емитува ниту финалето, ниту полуфиналните вечери во 2026 година!

Бојкотот е мотивиран од двоен фронт: хуманитарната трагедија во Газа и сериозни сомнежи за злоупотреба на Евровизија за политички цели! Јавните сервиси зборуваат за притисоци, несразмерни кампањи и нефер практики во гласањето, а новите правила на ЕБУ ги сметаат за недоволни за враќање на довербата.

Додека едни бојкотираат, други силно ја поддржуваат одлуката на ЕБУ. Германија претходно предупреди дека ќе ја преиспита својата улога ако Израел биде исклучен. Овие земји инсистираат дека натпреварот мора да остане исклучиво културна арена, осудувајќи го бојкотот како непотребно политизирање.

Со повлекувањето на четири големи земји, вклучувајќи ја и моќната Ирска, и најавата за медиумски бојкот на преносите, ова е најсериозниот потрес за Евровизија во последните децении! Наместо да ја слави својата 70-годишнина со еуфорија, натпреварот во 2026 година започнува во сенка на длабоки поделби, прашања за интегритетот на гласањето и жешка дебата – дали е воопшто можно да се одвои културата од политиката кога во позадина беснее војна?!

Рускиот регулатор за комуникации Роскомнадзор го блокира пристапот до Snapchat, апликацијата за привремено споделување фотографии и видеа, објави државната новинска агенција РИА.

Властите наведуваат дека една од причините за забраната е наводната злоупотреба на Snapchat „за организирање и извршување терористички акти и за регрутирање сторители“ во земјата.

Оваа одлука следува по слични ограничувања на други странски технолошки платформи, вклучително FaceTime на Apple, YouTube на Google, WhatsApp и Telegram на Meta, како дел од засилената кампања на Русија против апликации за кои властите тврдат дека се користат за криминални активности.