Градоначалникот на Битола, Тони Коњановски, синоќа беше дел од 61-та манифестација „Избор на најдобри спортисти и екипи на Битола“, каде што ги истакна заложбите на локалната самоуправа за развојот на спортот и подобрување на спортската инфраструктура во градот.
Во своето обраќање, Коњановски честиташе на сите добитници на наградите и нагласи дека вложувањата во спортот се оправдани, бидејќи Битола има врвни спортисти и тимови кои ја претставуваат не само на национално, туку и на меѓународно ниво.
„Заложбата на општината мора да биде насочена кон подобрување на условите на сите нивоа – од училишните спортски сали и игралишта, до професионалните спортски објекти. Продолжуваме со вложувања, како што тоа го направивме во спортската сала ‘Боро Чурлевски’, а ќе ја унапредиме и инфраструктурата на стадионот ‘Петар Милошевски’“, истакна Коњановски.
Градоначалникот ја имаше честа да ја додели наградата за најдобар спортист на Битола за 2024 година на капитенот на РК Еурофарм Пелистер, Филип Кузмановски, кој го предводеше својот тим до титулата и успешно настапуваше во Лигата на шампионите.
Покрај признанијата за спортистите и спортските екипи, на настанот беа доделени и награди за ветерани на спортот, општествено одговорни компании, како и за најдобри младинци и училишни спортски иницијативи.
„Сите вие кои вечерва сте дел од оваа манифестација сте гордост на Битола. Вашите достигнувања се поттик за младите генерации и мотивација за уште поголеми успеси. Ви благодарам што со вашите резултати ја претставувате Битола во најдобро светло“, порача Коњановски.
Манифестацијата уште еднаш потврди дека спортот во Битола има светла иднина, а поддршката од општината ќе продолжи со цел создавање подобри услови за спортистите и младите таленти.
