Семејството на легендарниот возач на Формула 1, Михаел Шумахер се огласи со соопштение до јавноста.
Вистинска реткост е огласувањето на сопругата на Шумахер, Корина и нивните деца. Тие сега објавија дека поднеле жалба поради одлуката на судот во Вупертал “благо” да го казни поранешниот телохранител Маркус Фричи поради обид за изнуда.
Три лица биле вмешани во обид за уцена на семејството Шумахер, а само еден од нив е осуден со затворска казна. Тројцата обвинети се заканиле дека ќе ја објават големата колекција на приватни видео-снимки и фотографии од легендарниот шофер на Формула 1, доколку семејството не плати огромна количина пари.
Шумахер не е видено во јавноста, ниту се објавени негови фотографии од декември 2013 година, кога се здоби со тешка повреда на главата предизвикана при скијање.
Јилмаз Тозтуркан, обезбедување во еден ноќен клуб во Германија, осуден е на три години затвор поради обид за изнуда во која од семејството се барани дури 15 милиони евра. Јилмаз, како и неговиот син Даниел Линс, биле обвинети бидејќи се заканиле дека ќе објават околу 900 фотографии и 600 видео-снимки, како и дигитални записи од неговите медицински досиеја.
Даниел Линс е осуден на шест месеци условна казна поради помагање, како и парична казна од 1.200 евра.
Поранешниот телохранител на семејството Шумахер на нивниот имот во Швајцарија, судено му е за обезбедување информации и фотографии на таткото и синот. Обвинителите утврдиле дека материјал бил продаден за петцифрена сума. Тој доби поблага казна бидејќи е осуден само како соучесник во обидот за изнуда, со што добил две години условна казна.
Семејството Шумахер поднесе жалба на одлуката на судот да поранешниот телохранител помини само со условна казна.
“Поднесовме жалба бидејќи сметаме дека е премногу блага казна за господинот Маркус. Според нашето мислење, тој беше мозокот на оваа операција. Она што и понатаму не шокира е масовната злоупотреба на довербата. Би требало да добие казна која во иднина ќе ги одврати сите потенцијални имитатори”, стои во соопштението кое го потпишала Корина Шумахер.
После Корина, се огласи и семејниот адвокат Тил Дам, кој изјави дека не се согласува со одлуката на судот: “Можете да бидете сигурни дека ќе ги искористиме сите правни можности кои ни стојат на располагање”.
Семејството Шумахер се уште не знае каде е исчезнатиот хард-диск.
“Не знаеме каде се наоѓа исчезнатиот хард диск. Немам кристална топка, но постои можност за нови закани низ некои алтернативни канали”, објаснил адвокатот.
