На повик на Германската амбасада, денес во Кочани пристигна конвој со хуманитарна помош од Германија, предводен од група пожарникари кои несебично донираа специјализирано противпожарно возило и значајна количина опрема на своите колеги од Доброволното противпожарно друштво (ДПД) Кочани.

Германските пожарникари, со голема пожртвуваност, земале одмор од нивните работни обврски и лично патувале речиси 3.000 километри за да ја достават донацијата. Со овој чин, тие не само што ги подобрија условите за работа на кочанските пожарникари, туку и испратија силна порака на солидарност и пријателство.

Оваа донација е значаен придонес за зајакнување на капацитетите на ДПД Кочани и уште еден доказ дека преку соработка и добра волја се градат мостови меѓу народите.

Извор: 24инфо.мк

На барање на локалните жители и населението кое го користи локалниот пат за с.Буково и нивното укажување на проблемите за безбедно одвивање на сообраќајот, поради недоволната ширана на патот од 3,5 м’, Општина Битола спроведе постапка и склучи договор за изведба и проширување на коловозот.

Вкупната вредност на договорот изнесува 19.690.365 денари, а рокот на изведба е 90 дена.

Работните активности на терен се веќе започнати, а од понеделник на овој патен правец ќе биде воведен времен режим на сообраќај.

-Доградбата (проширувањето) на дел од постоечкиот коловоз е со должина од 600 м, а ширината на асфалтниот дел од коловозот ќе изнесува 5,50 м’, односно ќе се изврши симетрично проширување на постоечкиот коловоз од две страни од по 1,0 м, соопшти Општина Битола.

Од двете страни на коловозот (до асфалтниот дел) предвиденa е изработка на банкини со ширина од по 75 см. од секоја страна.

-Во банкината на пониската страна ќе се вградат префабрикувани бетонски каналети до самиот раб од доградениот асфалт со димензии 40/20/50 см, додека на останатите 35 см, од банкината ќе се изврши стабилизација со бетонирање на АБ плоча со д = 10 см. Банкината на повисоката страна ќе се стабилизира само со бетонирање на АБ плоча со ширина од 75 см. и д=10 см, потенцираа од Општина Битола.

Вака прифатената атмосферска вода преку каналетите во банкините, предвидено е да се спроведува во префабрикувани бетонски риголи со димензии 50/40 х 50 см. поставени од двете страни на патот.

Во рамките на одбележувањето на Денот на основањето на Универзитетот „Св. Климент Охридски“ – Битола, денес се одржа Отворен ден под мотото „Корени и крилја“, со цел промоција на студиските програми пред матурантите и афирмација на меѓународната соработка преку партнерството со КОЛОРС Алијансата.

На панел-дискусијата свое обраќање имаше и градоначалникот на Општина Битола, Тони Коњановски, кој ја нагласи улогата на општината во креирањето услови за образование, развој и афирмација на младите. Тој посочи дека стекнувањето на високообразовна диплома е суштинско за личниот напредок, но и за целокупниот развој на општеството.

Коњановски ги презентираше и програмите што Општина Битола ги спроведува за поддршка на младите: активното функционирање на Младинскиот центар, финансиската поддршка за младински проекти, програмата за летна студентска пракса со паричен надоместок, како и активностите на Локалниот младински совет кој има улога во иницирање младински политики на локално ниво.

„Младите се најважната алка на едно општество. Наша обврска е да вложуваме во нивниот развој, да ги поддржуваме нивните иницијативи и да создадеме услови каде што ќе останат и напредуваат токму тука – во Битола“, истакна Коњановски.

Активностите продолжија на платото пред Офицерскиот дом, каде претставници на Младинскиот совет и Општина Битола ги претставија сите достапни програми и можности за младите.