Министерката за енергетика, рударство и минерални суровини, Сања Божиновска, во својата колумна за Фактор го истакна значењето на новиот Закон за енергетика како клучен чекор кон долгорочна енергетска стабилност и одржлив развој на Македонија. Таа нагласи дека со овој закон, земјата целосно ќе го усогласи своето законодавство со европските директиви, воспоставувајќи нови механизми за зајакнување на енергетската безбедност, привлекување инвестиции и подобрување на условите за граѓаните и стопанството.
„Подготовката на Предлог-законот се спроведе во инклузивен процес со учество на државните институции, енергетските компании, стопанствениците, експертите и граѓанскиот сектор“, истакна министерката, додавајќи дека овој пристап претставува новина и вистинска алатка за транспарентност и учество на заинтересираните субјекти.
Со транспонирањето на Четвртиот енергетски пакет на Европската унија, Македонија ќе воспостави поодржлив, транспарентен и интегриран енергетски систем. Ова ќе придонесе за стабилни и конкурентни цени на електричната енергија за домаќинствата и индустријата. „Една од клучните цели на новиот закон е да обезбеди сигурност и стабилност во снабдувањето со електрична енергија“, посочи Божиновска. Таа објасни дека со јасни регулативи за инвестиции во нови енергетски капацитети, вклучително и складирање на електрична енергија, законот ќе овозможи поефикасно управување со производството и потрошувачката.
Дополнително, законот предвидува зголемена регионална соработка и поврзаност со европските енергетски пазари, што ќе ја зголеми конкурентноста и ќе создаде поволни услови за граѓаните и стопанството. „Со вклучувањето на Македонија во ‘market coupling’ со Грција, државата ќе може полесно да ги исполни условите и да ги минимизира економските ризици што би произлегле од воведувањето на CBAM“, додаде министерката.
Законот исто така создава подобри услови за инвестиции во обновливи извори на енергија, како што се соларни, ветерни и хидро електрани, овозможувајќи искористување на огромниот потенцијал кој Македонија го има во производството на чиста енергија. „Со ова законско решение ја градиме иднината заснована на сигурна, достапна, одржлива и зелена енергија, амбиент во кој граѓаните и стопанството ќе можат да ја почувствуваат придобивката од модерната енергетска политика“, заклучи Божиновска.
