Тетово, Бутел, Струмица, Струга и Карпош засегнати од замрзнувањето на средствата на УСАИД

Одлуката на американскиот претседател Доналд Трамп за замрзнување на речиси целата странска помош на САД ја зафати и Македонија, оставајќи неколку општини во неизвесност околу финансирањето на проекти поддржани од Американската агенција за меѓународна помош (УСАИД).

Меѓу засегнатите се општините Тетово, Бутел, Струмица, Струга и Карпош, каде што беа стопирани инфраструктурни, образовни и развојни иницијативи.

Во Тетово, реконструкцијата на улиците Пролетерска и Прохор Пчински е ставена во мирување, бидејќи УСАИД требаше да покрие 30-40% од предвидените трошоци. Во Бутел, нема одговор како ќе се обезбедат 800.000 долари, предвидени за новата водоводна мрежа за Љубанци и Љуботен.

Струмица се соочува со прекин на два проекта – изградба на мултифункционален центар и обука на професори по англиски јазик, додека во Струга е запрена кампањата „Општина на дланка“ за дигитална транспарентност. Општина Карпош, иако нема директна соработка со УСАИД, доби известување дека се одложува проект за енергетска ефикасност.

Американската амбасадорка Анџела Агелер изјави дека засега нема конкретни информации за влијанието на одлуката врз Македонија, но увери дека САД остануваат посветени на соработката.

УСАИД, основана во 1961 година, досега беше активна во повеќе од 100 земји со годишен буџет од околу 40 милијарди долари. Новата наредба на Трамп предвидува 90-дневна пауза за проценка на ефективноста на американската странска помош, додека агенцијата се соочува со големи кадровски кратења како дел од владината реорганизација предводена од Илон Маск.

Извор: СДК.мк