Република

Тони Коњановски доби признание за посветеноста кон хуманоста и солидарноста

Во свечена атмосфера, по повод одбележувањето на 80-годишнината од формирањето на Црвениот крст во Македонија, градоначалникот на Општина Битола, Тони Коњановски, доби заслужено јубилејно признание за континуираната поддршка и посветеноста кон хуманитарните активности и ранливите категории граѓани.

На настанот, одржан во Офицерскиот дом во Битола под мотото „80 години, Ние гледаме луѓе“, беше потенцирано дека Општина Битола, под раководство на Коњановски, активно соработува со Црвениот крст, реализирајќи бројни проекти за згрижување на бездомни лица, поддршка на лица со попреченост, како и создавање подобри услови за повозрасните граѓани.

„Осум децении хуманост се сведоштво за огромна посветеност и љубов кон луѓето. За Општина Битола, ова не е само обврска, туку чест и одговорност да продолжиме да ги поддржуваме најранливите категории, градејќи заедница заснована на солидарност и грижа“, истакна Коњановски во своето обраќање.

Општина Битола и Црвениот крст остануваат партнери во мисијата за подобрување на социјалната заштита, а ова признание е уште еден доказ за искрената заложба на локалната самоуправа за хуманите вредности.

Република

Утре две тетовски села ќе бидат без струја

Поради планирани технички зафати, утре (10 декември 2025) две села во тетовскиот регион ќе останат без електрична енергија во период од 09:00 до 14:00 часот.

Според најавата, прекин ќе има во делови од селото Џрпчиште, особено кај објектите што се наоѓаат во близина на млекарницата „Алпи“.

Исто така, без струја ќе бидат и делови од селото Теарце, поточно подрачјето во близина на полициската станица.

Од надлежните апелираат жителите да ги планираат своите активности согласно најавениот прекин.

Република

Јорданов со апел до граѓаните по вандализмот во центарот на Штип

Градоначалникот на Штип, Иван Јорданов, остро реагираше по серијата инциденти во централното градско подрачје, каде беа исечени новогодишни сијалици, уништени садници и оштетена урбана опрема. Тој оцени дека овие дејствија претставуваат сериозен удар врз заедничкото добро и вложувањата на општината.

„Сведоци сме на слики кои никој од нас не сака да ги види. Ваквите постапки не се само вандализам, туку ја нарушуваат сликата на градот и го поткопуваат трудот на сите кои работат за поуредено урбано окружување,“ истакна Јорданов.

Тој упати апел до СВР Штип да преземе мерки и санкции кон сторителите, потенцирајќи дека ваквото однесување ја загрозува безбедноста и ја понижува заедницата.

Јорданов ги повика и граѓаните на повисока свест и одговорност: „Нашиот град може да биде онаков каков што го посакуваме само ако секој од нас покаже грижа. Само заеднички можеме да го сочуваме јавниот простор и да создадеме средина во која сите се чувствуваме горди да живееме.“

„Нашиот град е наш дом и наша должност е да го чуваме,“ заклучи градоначалникот, охрабрувајќи ги жителите да реагираат доколку забележат уништување и да придонесат за заштита на градот.

Република

ЈП „Паркинзи“ го активира синџирот на пешачката зона во Битола

Битола, 9 декември 2025 – Јавното претпријатие „Паркинзи“ известува дека од утре повторно ќе се постави синџирот на улица „Рузвелтова“.

И покрај тоа што Советот на Општина Битола ја прогласи улицата за пешачка зона, несовесни возачи ја игнорираа сообраќајната сигнализација, што го направи неопходно повторното воведување на мерката за ограничување на сообраќајот.

ЈП „Паркинзи“ апелира до граѓаните да ги почитуваат правилата за да се овозможи безбедно движење на пешаците и одржување на редот на оваа прометна улица.