Првиот потпретседател на Владата и министер за животна средина и просторно планирање, Изет Меџити, денеска директно од теренот во селото Оризаре, општина Липково, најави нова ера во заштитата од поплави: “започна изградбата на цврсто, безбедно и трајно корито на реката кое ќе ја штити населбата и ќе го промени секојдневието на жителите во годините што претстојат!”

Со инвестиција вредна 15 милиони денари, целосно обезбедена од Министерството за животна средина и просторно планирање, проектот опфаќа 830 метри заштитно корито со потпорни ѕидови високи 1,4 метри – дефинитивно ставајќи крај на годините на страв од надојдени води.

„Овој проект не е само обична инфраструктура – ова е заштита на домови и земјоделски поседи, спокој на семејствата и вложување во поквалитетен живот. Ова не е политички проект, ова е реален проект за луѓето кои живеат тука!“, истакна Меџити во својата изјава за медиумите.

Заштитниот ѕид ќе биде обложен со камен, не само за стабилност туку и за естетска вредност – Оризаре ќе биде не само побезбедно, туку и поубаво место за живеење.

Министерот Меџити потенцираше дека овој проект е дел од севкупната стратегија на Министерството за животна средина и просторно планирање која опфаќа финансирање на општински иницијативи за водоснабдување, канализациони системи, третман на отпадни води и останати мерки за заштита од поплави.

“Ние секојдневно остануваме на терен и промените стануваат видливи – сега, овде, за секој граѓанин” – заклучи Меџити.

Скопје, 16 април 2025 – Хајделберг факултет и НЛБ Банка АД Скопје официјално ги здружија силите во имплементацијата на германскиот модел на дуално високо образование во Северна Македонија. Партнерството беше официјализирано со потпишување на Меморандум за соработка на 14 април во просториите на банката.

Во име на НЛБ Банка, документот го потпишаа м-р Дејан Маџовски, директор на сектор за човечки ресурси и Елизабета Саздовска, помошник директор, додека Хајделберг Факултет беше претставен од м-р Даниела Стефаноска, директорка и проф. д-р Улрих Цајтел, претседател на Одборот на директори.

Со овој меморандум се отвораат нови можности за студентите, можност за практична настава во рамки на реномирана банка, работа на реални проекти и директно менторство од докажани експерти од финансискиот сектор.

„Партнерството со НЛБ Банка е голем чекор напред во визијата за градење на образовен модел кој ги подготвува студентите за реалниот свет. Нашата цел е да креираме генерации подготвени да се вклучат во современиот пазар на труд уште за време на студиите,“ изјави проф. д-р Улрих Цајтел.

Хајделберг факултет е прв во земјата кој системски го воведе концептот на дуално образование – со комбинирање на академско знаење и професионална пракса. Преку оваа соработка, студентите ќе имаат уникатна можност да учат и работат истовремено, градејќи релевантни вештини и искуство во текот на целиот тригодишен циклус.

Како што беше нагласено на настанот, факултетот е под супервизија на Универзитетот Провадис од Франкфурт и веќе е акредитиран како партнер за германски додипломски студии во регионот на Западен Балкан.

Од НЛБ Банка нагласуваат дека ваквото партнерство е дел од нивната долгорочна стратегија за поддршка на младите и развој на талентирани кадри. „Инвестирањето во образованието е инвестиција во иднината – а токму со овој модел, го скратуваме јазот меѓу теоријата и праксата,“ велат од банката.

Соработката предвидува вклучување на студенти во активни проекти, менторирање, како и можност за кариера во рамки на НЛБ уште од прва студиска година.

Прогноза за времето: Променливо и нестабилно, но со сончеви моменти

Денеска не’ очекува променливо облачно време, со повремени сончеви периоди. Кон крајот на денот и во текот на ноќта се очекуваат локални врнежи од дожд, а можно е и ретки грмежи на одредени места. Ќе дува слаб до умерен ветер, а долж Повардарието повремено ќе биде и засилен, од југоисточен правец.

Температурите ќе се движат од 5 до 11 степени Целзиусови во утринските часови, додека дневните ќе достигнат од 19 до 23 степени.

Во Скопје, слично како и во остатокот од земјата – времето ќе биде променливо облачно со сонце во текот на денот, но кон вечерта се очекува дожд и можност за грмежи. Ќе дува умерен, а понекаде и засилен југоисточен ветер. Минималната температура ќе биде околу 10 степени, а максималната до 23 степени.

Според информации од УХМР, до петок ќе продолжи нестабилното време – со локални врнежи, можни поројни дождови, грмежи и засилен ветер. Добрата вест е што за време на викендот времето ќе се стабилизира – ќе биде сончево и топло, идеално за прошетка или излет.