Магазин

Зачувајте ја младоста: Ова се најдобрите методи и козметички средства за спречување на предвремено стареење

Стареењето на кожата е нормален процес кој започнува во одреден период на животот.

Секако дека овде главниот збор го има генетиката, но најновите истражувања велат дека, всушност на наследниот фактор му припаѓа само една третина од изгледот на кожата, додека другите два дела се резултат на личната грижа за себе и на изборот на вистинскиот, односно соодветниот козметички третман.

Топ-совети

Првиот совет е лесно остварлив, ако често не го применуваме – значи никогаш не одете на спиење, ако претходно не сте ја извадиле шминката од своето лице. Исчистете ја добро со соодветен лосион, а потоа ставете ноќен крем, кој ќе и овозможи на кожата да се регенерира во текот на ноќта и ќе го санира сето она што во текот на денот било изложено на негативни влијанија.

Спас од сонцето

Напријател број еден на вашата кожа е сонцето, затоа пред секое излегување од дома добро вооружете се со кремови и подлоги, кои во себе го имаат добро интегриран факторот СПФ. Проверете производите дали се за борба против УВА и УВБ зраците, бидејки факторите се главни генератори на слободните радикали, а со тоа и најголеми виновници за стареење на кожата.

Критични зони

ПРВА. Особено внимание обрнете им на најкритичните делови на лицето, како што е кожата околу очите, која е прва на удат, бидејќи е многу тенка, речиси нема поткожно мрсно ткиво, а мускулите во текот на денот прават и до 10.000 движења, мимки. Затоа е неопходно рана да се отпочне со интензивна хидратација и со благи антиридни средства, а доколку штетата веќе е направена, потребно е да користите препарати на база на протеини на соја, ориз или просо, бидејќи тие имаат исклучително ефикасен лифтинг ефект.

ВТОРА критична зона е пределот околу вратот и деколтето. За жал, многу жени во текот на младоста за време на својата секојдневна нега, го прескокнуваат токму овој дел, а тоа е голема грешка која подоцна ја приметуваат. Со кремот со кој го негувате лицето обавезно премачкајте ги вратот и деколтето, а тоа направете го со пилинг или маска.

Магазин

Евровизија 2026 во Израел доби зелено светло, но четири земји веќе најавија бојкот

Најголемиот европски музички спектакл е погоден од невидена политичка бура, која ја доведува во прашање неговата иднина. Откако Европската радиодифузна унија (ЕБУ) му даде „зелено светло“ на Израел да настапи во 2026 година, четири земји – Ирска, Шпанија, Холандија и Словенија – официјално објавија бојкот на натпреварот!

Одлуката беше донесена на Генералното собрание на ЕБУ, каде што членките не гласаа за исклучување на Израел, туку усвоија нов пакет правила за наводна „заштита на интегритетот и неутралноста“ на натпреварот. Овој маневар, кој практично го задржа Израел во игра, го предизвика гневот на неколку јавни сервиси.

Ирска (рекордерот по победи!), шпанската РТVE, холандскиот Авротрос и словенечкиот РТВСЛО го спроведуваат своето претходно ветување. Тие едногласно сметаат дека учеството на Израел, во услови на војна во Газа и хуманитарна катастрофа, е некомпатибилно со мисијата и јавните вредности на медиумите!

Холандија се огласи за нејзиното учество на Евровизија: „во сегашните околности е некомпатибилно со јавните вредности што се важни за нас“. Шпанија оди до крај, РТVE не само што се повлекува, туку најавува дека нема да ги емитува ниту финалето, ниту полуфиналните вечери во 2026 година!

Бојкотот е мотивиран од двоен фронт: хуманитарната трагедија во Газа и сериозни сомнежи за злоупотреба на Евровизија за политички цели! Јавните сервиси зборуваат за притисоци, несразмерни кампањи и нефер практики во гласањето, а новите правила на ЕБУ ги сметаат за недоволни за враќање на довербата.

Додека едни бојкотираат, други силно ја поддржуваат одлуката на ЕБУ. Германија претходно предупреди дека ќе ја преиспита својата улога ако Израел биде исклучен. Овие земји инсистираат дека натпреварот мора да остане исклучиво културна арена, осудувајќи го бојкотот како непотребно политизирање.

Со повлекувањето на четири големи земји, вклучувајќи ја и моќната Ирска, и најавата за медиумски бојкот на преносите, ова е најсериозниот потрес за Евровизија во последните децении! Наместо да ја слави својата 70-годишнина со еуфорија, натпреварот во 2026 година започнува во сенка на длабоки поделби, прашања за интегритетот на гласањето и жешка дебата – дали е воопшто можно да се одвои културата од политиката кога во позадина беснее војна?!

Магазин

Русија го забрани Snapchat – Ова се причините

Рускиот регулатор за комуникации Роскомнадзор го блокира пристапот до Snapchat, апликацијата за привремено споделување фотографии и видеа, објави државната новинска агенција РИА.

Властите наведуваат дека една од причините за забраната е наводната злоупотреба на Snapchat „за организирање и извршување терористички акти и за регрутирање сторители“ во земјата.

Оваа одлука следува по слични ограничувања на други странски технолошки платформи, вклучително FaceTime на Apple, YouTube на Google, WhatsApp и Telegram на Meta, како дел од засилената кампања на Русија против апликации за кои властите тврдат дека се користат за криминални активности.

Магазин

Четири нови животи: Тројца браќа станаа татковци во ист ден

Тројца браќа од Израел доживеале редок и емотивен момент откако нивните сопруги родиле вкупно четири бебиња во еден ден. Среќниот настан се случил во вторник во медицинскиот центар „Мајанеи Хајешуа“ во Бнеи Брак, во близина на Тел Авив.

Бебињата се родиле во интервал од неколку часа, а меѓу нив има и пар близнаци, што значи дека семејството за еден ден добило четири нови членови.

Портпаролката на болницата за германската новинска агенција ДПА го опиша повторното обединување на тројцата браќа во породилното одделение како „посебен и изненадувачки момент“.

„Никаква статистика не можеше да нè подготви за овој уникатен момент. За миг застанавме, се насмевнавме и повторно бевме трогнати од магијата што се случува тука секој ден“, рече таа.

Медицинскиот центар „Мајанеи Хајешуа“ е познат по големиот обем на работа, особено со религиозната заедница во Бнеи Брак. Статистиките покажуваат дека стапката на фертилитет во Израел е 2,9 деца по жена, што е највисока меѓу земјите членки на ОЕЦД, нагласува ДПА.