Џекпотот од 500.000 евра во Тулуза се уште не е превземен бидејќи оние кои ја купиле грепката, го сториле тоа со кредитна картичка која била украдена.
Двајца бездомници кои ја купиле победничката грепка со украдена картичка добиле понуда која потенцијално би можела да им го промени животот – дел од џекпотот доколку го донесат добитничкиот тикет.
Целата ситуација ги остави правниците збунети околу тоа кој има право на добивката: личноста која ја купила грепката или личноста која ја платила? И дали лотаријата воопшто ќе ги исплати парите?
Весникот Паризиен ја опиша целата приказна како нешто што заслужува филм. Двајца бездомници обиле автомобил паркиран во центарот на Тулуза на 3. февруари и украле ранец во кој се наоѓа кредитна картичка и лични документи на човек, кој весникот го именуваше како Жан-Давид.
Жртвата (42) пријавила кражба во полиција и ја контактирала банката да ја блокира картичката. На прашањето дали картичката била користена, го известиле дека тој ден во три часот попладне крадците ја искористиле картичката во една продваница да купат работи во вредност од 52.50 евра.
Загрижен да ги пронајде документите, Жан-Давид отишол во продавницата следното утро да ја објасни ситуацијата и да ги праша дали имаат безбедносни камери.
“Се надевав дека ќе ги најдам барем документите, но продавачот не можеше да ми помогне. Ми кажа дека имало двајца бездомници помеѓу 30 и 40 години кои купиле цигари и грепка. Му делувале сомнително бидејќи пред тоа се обиделе да платат со друга картичка, на која не го знаеле пинот”, изјавил тој за полицијата.
Откако ја изгребале грепката, откриле дека освоиле џекпот од 500.000 евра, па се вратиле во продавницата да ја добијат својата награда. Од продавницата ги известиле дека треба да ја контактираат компанијата која ја води француската национална лотарија.
“Сопругата на сопственикот на продавницата изјавила дека се сомнева дека ќе ги најдат, бидејќи таа ја проверила грепката и навистина освоиле 500.000 евра. Изјавила дека биле толку среќни, што си ги заборавиле петте кутии цигари кои претходно ги купиле”, раскажа Жан Давид.
Од тој момент, ситуацијата се наоѓа во некој вид на правен вакум. Крадците не се обиделе да ја превземат наградата, а полицијата во Тулуза го замрзна победничкиот тикет додека не се заврши истрагата.
Жан-Давид сега ги повика крадците да го контактираат неговиот адвокат.
“Зошто да не се договориме пријателски? Зошто да не ги поделиме парите?”, праша Жан-Давид.
