Вработените во американската влада во саботата добија е-маил со неочекувано барање – да испратат краток извештај за своите достигнувања од изминатата недела или да поднесат оставка. Ова е најновата мерка на администрацијата на Трамп за намалување на федералната работна сила, предводена од Илон Маск, кој раководи со Одделот за владина ефикасност (DOGE).
„Неодговорот ќе се смета за оставка“, напиша Маск на платформата X, додавајќи дека оние кои одговорат може да бидат земени предвид за унапредување.
Американскиот синдикат на владини службеници овој потег го нарече „суров и непочитувачки“ и најави правни чекори против можните отпуштања. Во меѓувреме, новиот директор на ФБИ, Каш Пател, им порача на своите вработени да не одговараат на е-маилот, нагласувајќи дека ревизиите во ФБИ се спроведуваат според внатрешните процедури.
Претседателот Трамп на конференцијата CPAC порача дека владината работна сила ќе биде намалена и поефикасна. Тој го пофали Маск за неговите напори и рече дека би сакал „да биде уште поагресивен“ во кратењата.
Во последните недели илјадници владини службеници, вклучувајќи вработени во IRS, Пентагон и FAA, веќе беа отпуштени како дел од оваа иницијатива.
