Лидерот на ЦДУ, Фридрих Мерц, по завршувањето на изборите во Германија, јасно порача дека неговата партија нема да преговара за коалиција со крајнодесничарската Алтернатива за Германија (АфД).
„Ова го кажавме уште пред изборите и гласачите на АфД беа свесни за тоа“, изјави Мерц за време на ТВ-дебата со партиските лидери.
ЦДУ/ЦСУ освои 28,5% од гласовите, додека АфД постигна историски резултат со 20%, што ја пласира како втора најголема сила во земјата. Социјалдемократите (СПД) на актуелниот канцелар Олаф Шолц, забележаа рекордно ниски 16,5% и изјавија дека нема да учествуваат во формирање на новата влада.
Мерц нагласи дека ќе работи на создавање влада која ќе ја претставува целата земја и ќе се фокусира на решавање на клучните проблеми. Тој истакна дека формирањето влада нема да биде лесно, но изрази надеж дека процесот ќе биде завршен до Велигден.
Одбивајќи соработка со АфД, Мерц додаде: „Германија нема да бара стабилност во скутот на Путин“.
Од друга страна, лидерката на АфД, Алис Вајдел, истакна дека нејзината партија веќе е дел од мејнстрим политиката во Германија и дека нивниот резултат покажува дека се подготвени да влезат во власта. „Нашата врата останува отворена за коалициски разговори со ЦДУ“, изјави Вајдел, додавајќи дека доколку конзервативците одбијат да соработуваат, АфД ќе продолжи да расте и ќе стане водечка политичка сила во иднина.
Во меѓувреме, поранешниот американски претседател Доналд Трамп на социјалната мрежа Truth Social го поздрави изборниот резултат, истакнувајќи дека германските граѓани, слично како во САД, се заморени од политиките за енергија и имиграција што доминираа со години.
