Јаткастите плодови се исклучително богати со есенцијални хранливи материи и поради тоа се предмет на бројни истражувања, кои ги докажуваат нивните позитивни ефекти на здравјето на мозокот и срцето.
Исхраната има клучна улога во одржувањето на когнитивните функции и правилната циркулација на крвта, а недостигот на здрави масни киселини, антиоксиданси и влакна може да го зголеми ризикот од проблеми со памтењето и кардиоваскуларни болести.
Затоа, балансираната исхрана која е богата со овие елементи е важна за долгорочна превенција на овие проблеми.
Меѓу намирниците кои имаат најголеми благотворни ефекти на памтењето и здравјето на срцето се јаткастите плодови – особено оревите – кои се на истакнато место. Редовната консумација може да го намали ризикот од срцеви заболувања и да ги подобри когнитивните функции, правејќи ги неизоставни за здравјето на мозокот и кардиоваскуларниот систем.
Едно истражување испитувало какви ефекти има долгогодишната консумација на јаткасти плодови врз проток на крв во мозокот кај постарите луѓе, пишува Daily Express. За време на 16 недели, испитаниците секојдневно консумирале индиски ореви, ореви, лешници и фстаци во препорачани количини.
Резултатите покажале подобрен проток на крв во мозокот и подобри резултати на тестовите за паметење. Истражувањето забележало зголемен проток на крв во клучни делови на мозокот, вклучувајќи ги фронталниот и префронталниот кортекс, кои се важни за когнитивните функции.
Друго истражување покажало дека консумацијата на јаткасти плодови, особено ореви, барем еднаш неделно, може да го намали ризикот од кардиоваскуларни болести за 13 до 19 проценти, додека ризикот од коронарна болест е намален меѓу 15 и 23 проценти, што дополнително ги потврдува нивните заштитни ефекти на срцето.
Благотворните ефекти на јаткастите плодови се припишуваат на нивниот богат состав на здрави масти, влакна и антиоксиданси, кои ги намалуваат воспалителните процеси и го подобруваат функционирањето на крвните садови.
Овие фактори не само што ја поттикнуваат здравата циркулација, туку имаат и директен позитивен ефект на долгорочното одржување на когнитивните способности.
