Денес се навршуваат три години откако рускиот претседател Владимир Путин ја започна целосната инвазија на Украина.
Францускиот претседател Емануел Макрон оствари разговори со американскиот претседател Доналд Трамп за можностите за ставање крај на војната во Украина. Макрон беше првиот европски лидер што го посети Трамп, кој се врати на власт пред еден месец.
Тој заедно со Трамп учествуваше во видеоконференција за Украина со лидерите на Г7 во Белата куќа. На пат од Белата куќа до гостинската резиденција Блер, францускиот претседател изјави дека пречекот од страна на Трамп бил „многу добар и пријателски“. „Имавме видеоконференција во Овалната соба со Г7“, рече Макрон.
После тоа, двајцата лидери остварија билатерални разговори и одржаа заедничка прес-конференција.
Трамп: Не сакаме ова да доведе до Трета светска војна
„Мислам дека војната во Украина може да заврши брзо, можеби во рок од неколку недели, ако се покажеме паметни“, изјави Трамп пред новинарите во Овалната соба. „Ако не бидеме паметни, ова ќе продолжи… и тоа не го сакаме“, додаде тој, истакнувајќи дека оваа ситуација може да ескалира во Трета светска војна, но, како што рече, „ние тоа не го сакаме“.
Трамп неодамна разговараше со рускиот претседател Владимир Путин и тие се согласиле да започнат преговори за мир. Трамп беше прашан дали ќе го нарече Путин „диктатор“, како што тоа го направи за украинскиот претседател Володимир Зеленски. „Не го користам лесно тој термин, ќе видиме како ќе се развива ситуацијата“, одговори Трамп, додавајќи дека постои „шанса за многу добар договор“ меѓу Украина и Русија. Тој предупреди дека нерешената војна може да води до Трета светска војна.
Трамп: Враќањето на украинските територии не е лесна работа
Еден од новинарите го праша Трамп дали смета дека Украина ќе треба да се откаже од некои територии во случај на мировен договор. „Ќе видиме“, рече Трамп. „Ова се преговори што сега започнуваат“, додаде тој, нагласувајќи дека враќањето на украинските територии окупирани од Русија е „многу сложено“.
Трамп претходно сугерираше дека Украина може да добие некои од своите територии, а минатата недела изјави дека руската окупација значи дека Русија „ја држи картата“ во преговорите. Тој исто така напомена дека Владимир Путин би прифатил европски мировни сили во Украина кога ќе заврши војната, иако Кремљ постојано тврди дека се противи на тоа.
