Спорт

Галатасарај го обвини Мурињо за расизам, откриено што направил

Галатасарај го обвини Жозе Мурињо за расистички изјави и соопшти дека ќе поведе кривична постапка против тренерот на Фенербахче поради неговите коментари по ремито 0:0 во Супер лигата во понеделник.

Иако не беше јасно на кои изјави мислат во Галатасарај, Мурињо рече дека клупата на домашниот тим „скокаше како мајмунска и дека натпреварот ќе беше катастрофален доколку го водеше турски судија“.

Натпреварот во понеделникот го судеше Словенецот Славко Винчич, откако двата клуба побараа странски арбитер да ја преземе таа должност во исклучително жешкото дерби на турскиот фудбал.

Галатасарај објави на X дека Мурињо „постојано давал погрдни изјави насочени кон турскиот народ“ откако ја презеде својата улога во лигата.

„Денеска неговиот говор ескалираше надвор од обични неморални коментари во недвосмислено нехумана реторика. Со ова официјално ја објавуваме нашата намера да покренеме кривична постапка во врска со расистичките изјави на Жозе Мурињо и соодветно ќе поднесеме формални жалби до УЕФА и ФИФА“, соопшти клубот.

Поранешниот прв тренер на низа европски фудбалски великани, Португалецот Мурињо, претходно беше казнет и суспендиран поради неговите коментари за турски официјални лица на натпреварот. Португалецот на прес-конференцијата по натпреварот повторно беше критичен кон турските судии.

„Отидов во соблекувалната на судијата по натпреварот. Секако, таму беше четвртиот судија, турскиот судија“, изјави Мурињо на прес-конференција. „Му реков на Винчиќ – ти благодарам што дојдовте овде бидејќи доаѓате на голем натпревар и вие сте одговорни за овој голем натпревар. Се свртев кон четвртиот судија и му реков дека, да сте вие судија, овој натпревар ќе беше катастрофа.

Мурињо го пофали и Винчич што не му дал жолт картон на дефанзивецот Јусуф Акчичек на почетокот на натпреварот и покрај жестоката реакција од клупата на Галатасарај, за која Португалецот рече дека е „мајмунска“.

Фенербахче во вторникот објави соопштение во одбрана на Мурињо, велејќи дека неговите коментари се извадени од контекст и намерно искривени.

„Како што секој разумен човек може да види и разбере, овие изрази со кои Жозе Мурињо ја опиша екстремната реакција на стручниот штаб на противничкиот тим на судиските одлуки за време на натпреварот, во никој случај не може да се поврзат со расизам“, се вели во соопштението на клубот.

„Обидот да се прикаже овој дискурс како расистички е целосно злонамерен пристап. Ја информираме јавноста дека ќе ги оствариме нашите законски права во врска со оваа патетична клевета која има за цел да ја истера конкуренцијата од теренот, да ја смени агендата и да манипулира со неа“, се додава во дговорот.

На контроверзноста се осврна и тренерот на Галатасарај, Окан Бурук, кој се потсмеваше на одговорот на Мурињо.

„Говорот на ‘Плачкото’ траеше малку предолго… Знаете, тој е познат по тоа што плаче, а сепак, овде плачеше долго. Тој плачеше внатре, влезе во собата на судиите и плачеше… па нека продолжи да плаче“, рече Бурук на прес-конференција во понеделникот.

Спорт

МАКЕДОНИЈА СЛАВИ ПРОТИВ ТУРЦИЈА НА ОТВОРАЊЕТО НА ТУРНИРОТ ВО АНКАРА

Женската ракометна репрезентација на Македонија стартуваше успешно на турнирот во Анкара, совладувајќи ја домашната селекција на Турција со 29:26. Натпреварот беше израмнет најголемиот дел од времето, со 12:12 на полувреме, но избраничките на селекторот Кристијан Грчевски го презедоа контролата во финишот и стигнаа до важен триумф.

Емилијана Ризоска блескаше со 11 постигнати гола, додека голманката Драгана Петковска се истакна со 10 интервенции, меѓу кои и одбрана на седмерец, што значително го насочи натпреварот во корист на Македонија.

Нашите ракометарки утре од 12 часот ќе играат против Словенија, а турнирот ќе го затворат в недела со дуел против Словачка, кој започнува во 10 часот.

Спорт

ВИДЕО: Димитриевски херој: Одбрани пенал во 119., па Валенсија ја нокаутира Картагена!

Валенсија со многу мака и драматични моменти избори пласман понатаму, откако по 120 минути фудбал успеа да го совлада второлигашот Картагена со 2-1. Херој на вечерта беше македонскиот голман Столе Димитриевски, кој со блескава интервенција во самиот финиш го задржа тимот во игра.

Картагена поведе во првото полувреме, кога Ортуно успеа да го совлада Димитриевски, па домаќините ја завршија паузата со водство од 1-0. Тоа резултатско преимуство траеше сè до 80. минута, кога Белтран погоди и донесе израмнување за Валенсија.

Кулминацијата на драмата се случи во 119. минута, кога Картагена доби пенал. Санчез шутираше, но Димитриевски со фантастична одбрана ја спаси својата екипа и го одржа резултатот жив. Само две минути подоцна, во 121. минута, Васкез одлично реагираше и погоди за конечни 2-1, обезбедувајќи победа и големо славје за гостите.

Димитриевски ја обележа вечерта со одбрана која директно ја смени судбината на натпреварот и уште еднаш потврди дека е еден од најсигурните голмани во Ла Лига.

Видеото може да го погледнете тука

Спорт

Млад талент од Австралија со јасна цел – Самуел Вртковски сака да игра за Македонија

Преку океанот, во далечна Австралија, расте нов македонски фудбалски потенцијал – 16-годишниот Самуел Вртковски, член на Macarthur Bulls, клуб што настапува во најсилната австралиска U16 лига. Иако се развива во сосема поинакво фудбалско опкружување, неговиот најголем сон останува ист: еден ден да го облече дресот на Македонија.

Роден во 2009 година, Самуел во септември ја прослави својата 16-та година. Настапува како дефанзивен играч за врска, позиција што ја покрива со голема сигурност, зрелост и техничка прецизност.

Младиот Вртковски веќе важи за играч со исклучително чувство за игра – одличен преглед, прецизни додавања и силна тактичка поставеност за своите години.

Неговите бројки оваа сезона го потврдуваат тоа:

Точност на додавања: 91% Добиени дуели: 2.9 по натпревар Пресечени топки: 2.3 по натпревар Успешни дриблинзи: 2.7 по натпревар Асистенции: 11 во сезоната

Со висина од 175 сантиметри, Самуел е физички подготвен и доминира во дуелите, што дополнително го прави атрактивен за секоја фудбалска школа.

Голема желба и на Самуел и на неговото семејство е во иднина да заигра за Македонија. Фудбалската фаланга постојано бара млади таленти ширум светот, а Вртковски несомнено е еден од нив.

Македонската фудбалска федерација би можела да обрне внимание на неговиот развој – а ако со својот квалитет ја заслужи шансата, воопшто не е невозможно во иднина да го видиме во црвено-жолтиот дрес.

Во коментарите под објавата се наоѓа и видео со најдобрите моменти од Самуел Вртковски.