Директната штета од руските напади во Украина сега се проценува на 176 милијарди долари, што е за 24 милијарди повеќе во споредба со претходната година.
Трошоците за обнова на украинската економија по завршувањето на руската инвазија се проценуваат на 524 милијарди долари, според податоците објавени од Светската банка, Обединетите нации, Европската комисија и владата на Украина.
Според британските медиуми, најтешко погодени сектори се домувањето, транспортот, енергијата, трговијата и образованието.
Украинската влада, со поддршка од донаторите, годинава обезбеди скоро 7,4 милијарди долари за приоритетни потреби, но сè уште недостигаат околу 10 милијарди долари.
Повеќе од 13 отсто од становите во Украина се оштетени или уништени, што ги погодува повеќе од 2,5 милиони луѓе.
Во текот на изминатата година, евидентирани се 70 отсто повеќе штети на електрични мрежи и електрани.
За обнова на станбениот сектор ќе бидат потребни околу 84 милијарди евра, додека само за чистењето на урнатините се проценува дека ќе бидат потребни речиси 13 милијарди евра.
