Зеленски: Руски наративи доминираат во САД, Вeнс индиректно ја оправдува агресијата на Путин

Украинскиот претседател Володимир Зеленски го обвини потпретседателот на САД, Џеј Ди Венс, дека „на некој начин ја оправдува“ руската инвазија врз Украина – што претставува најостра критика упатена до висок американски политичар од страна на Зеленски, по нивната бурна средба во Овалната соба во февруари.

Во интервју за американската емисија 60 минути, Зеленски изрази загриженост дека дел од американската администрација паднала под влијание на руската пропаганда и прифаќаат „изменета реалност“ во која не е јасно кој ја започнал војната, пренесува Politico.

„За жал, верувам дека руските наративи стануваат доминантни во САД“, изјави Зеленски, според преводот објавен од CBS News.

„Ова говори за огромното влијание што руската информативна политика го има врз Америка, врз американската политика и врз самите американски политичари“, додаде украинскиот претседател.

Тој посебно го издвоил потпретседателот Венс, обвинувајќи го дека „на некој начин ги оправдува постапките на Путин“.

„Се обидов да објаснам: Не може да се бара некаква средина. Постои агресор и постои жртва. Русија е агресорот, ние сме жртвите“, нагласи Зеленски, повикувајќи се на нивниот тензичен разговор во Белата куќа пред неколку месеци.

Овие изјави доаѓаат во период на зголемени тензии околу американската поддршка за Украина и во време кога украинското раководство апелира за јасна позиција од страна на своите западни партнери.

Парламентот на Малдиви усвои забрана за влез на израелски туристи во знак на солидарност со Палестинците

Парламентот на Малдиви денеска го одобри предлог-законот со кој се забранува влез на израелски државјани во земјата, како чин на солидарност со народот во Појасот Газа кој, како што се наведува во соопштението, се наоѓа „во окови на војната меѓу Израел и палестинското движење Хамас“.

Законот веднаш беше потпишан од страна на претседателот на Малдиви, Мохамед Муизу, јавува францускиот Фигаро.

„Малдиви уште еднаш ја потврдуваат својата непоколеблива солидарност со палестинската кауза. Оваа ратификација ја одразува јасната позиција на владата во однос на постојаните злосторства и геноцидни дејства што Израел ги врши врз палестинскиот народ“, се вели во соопштението од кабинетот на претседателот.

Забраната, која доби поддршка и од владејачката партија и од опозицијата, веднаш стапи во сила, соопшти портпаролот на претседателот.

Според официјалните податоци, Малдиви во февруари оваа година угостиле околу 214.000 странски туристи, од кои само 59 биле израелски државјани.

Претходната забрана за израелски туристи беше укината на почетокот на 1990-тите, а односите меѓу двете земји накратко беа обновени во 2010 година. Сепак, минатата година Министерството за надворешни работи на Израел веќе ги советуваше своите граѓани да ги избегнуваат патувањата на Малдивите поради зголемениот политички ризик.

Украина ја одби Москва, но може да заврши во канџите на американските корпорации

По речиси една деценија борба за независност од руското влијание, Украина се соочува со нов предизвик – опасноста од економска зависност од Соединетите Американски Држави. Иако земјата ја одби опцијата за мировни преговори со Русија и избра воена одбрана, сега се отвора ново прашање: ќе стане ли Украина нов економски плен на американските интереси?

Според извештај на Deutsche Welle, по доаѓањето на власт и неговите тврдења дека ќе стави крај на војната во рок од 24 часа, Доналд Трамп го насочи вниманието кон природните ресурси на Украина, особено ретките минерали. Иако договорот сè уште не е официјализиран, неговата администрација веќе работи на услови кои, според украинските политичари, можат да се протолкуваат како економско ропство.

Клучна точка на судир меѓу Киев и Вашингтон стана прашањето за контрола врз експлоатацијата на ретките минерали, како и гасоводот кој до скоро служеше за извоз на руски гас во Европа. Плановите на Вашингтон предвидуваат гасоводот да биде под надзор на државната американска агенција International Development Finance Corporation (IDFC).

Украинскиот опозициски пратеник Јарослав Железњак, член на партијата „Голос“, изрази незадоволство од предложените услови:
„Неприфатливо е тоа што сите износи треба да се пресметуваат во долари, а приходите да се чуваат надвор од Украина“, напиша тој на својот Телеграм канал.

Според предлог-договорот, приходите најпрво би се префрлале во САД, а Украина би добила дел дури откако ќе ја отплати сета воена и економска помош добиена од Вашингтон од почетокот на инвазијата. Дополнително, доколку профитот не ги исполни очекувањата, Киев ќе мора да ја надомести разликата од сопствени средства.

Претседателот Володимир Зеленски, кој неформално им се обрати на украински новинари, посочи дека зад зголемениот американски апетит стои министерот за финансии Скот Бесент. Тој истакна дека Киев не може да ги прифати сите нови барања, особено правото на вето од страна на САД врз сите идни инвестиции поврзани со експлоатацијата на минералните ресурси.

Дополнителна загриженост постои и во однос на европската интеграција на Украина – ваков договор со САД може да влезе во судир со регулативите на Европската Унија, за која земјата има јасна аспирација.

Украинската потпретседателка и министерка за правда, Олга Стефанишина, соопшти дека преговорите не се завршени. „Испративме нов предлог до САД минатата недела и сè уште се надеваме на заемно прифатливо решение“, изјави таа.

Сѐ погласни се и споредбите со ситуацијата во Ирак, каде природните богатства беа ставени под контрола на американски компании по инвазијата во 2003 година.

Иронијата е очигледна: Украина се обиде да избега од влијанието на Москва, а сега ризикува да стане економски заложник на Вашингтон.