Во трката за вештачка интелигенција, најголемите играчи како Microsoft, Google, Amazon и Meta инвестираат милијарди за да развијат AI што ќе ја обликува иднината. Но, зад сцената, постои една компанија без која оваа револуција не би била возможна – NVIDIA.
Од производител на графички картички за гејмери, NVIDIA денес е незаменлив двигател на AI индустријата. Нејзината технологија е основата врз која се градат најнапредните вештачки интелигенции. Овој бизнис модел ја направи NVIDIA една од најбрзо растечките компании во историјата на технологијата.
Во последниот квартал од 2024 година, NVIDIA оствари приход од 22,1 милијарди долари, што претставува раст од 265% во споредба со истиот период минатата година. Но, уште поимпресивно е што нејзиниот профит скокна за 769%, достигнувајќи 12,3 милијарди долари.
Како NVIDIA стана незаменлив дел од AI револуцијата?
Главниот двигател на овој експлозивен раст е Data Center сегментот, кој само во последниот квартал генерираше 18,4 милијарди долари приход, што е раст од 409% на годишно ниво.
Технологијата на NVIDIA е буквално во срцето на секој голем AI проект што се користи денес:
Microsoft користи NVIDIA чипови за своите cloud и AI решенија
Google ги напојува своите напредни јазични модели со нив
Amazon ги интегрира во својата AWS инфраструктура
Meta ги користи за развој на AI системи за персонализирани содржини
NVIDIA не се натпреварува директно во развојот на AI апликации – таа е компанијата што им ги продава најважните алатки на сите што сакаат да бидат дел од оваа револуција.
Гејмерите не се заборавени
Иако вештачката интелигенција е главниот двигател на растот, NVIDIA останува лидер и во гејминг индустријата. Во последниот квартал, Gaming сегментот оствари приход од 2,9 милијарди долари, предводен од новата GeForce RTX™ 40 SUPER серија.
Покрај тоа, компанијата активно инвестира во автономни возила, медицински истражувања и cloud инфраструктури, што ја прави еден од најразновидните технолошки гиганти.
Што следува за NVIDIA?
Компанијата веќе ги подготвува следните чекори:
Проширено производство на AI чипови за да се одговори на растечката побарувачка
Стратешки партнерства со водечките технолошки гиганти
Поголеми инвестиции во автономни возила и медицински AI решенија
NVIDIA – компанијата што ја диктира иднината
Додека Microsoft, Google, Amazon и Meta се борат за доминација во областа на AI, NVIDIA е компанијата што ги снабдува сите со неопходниот хардвер односно народски кажано им продава лопати да ископуваат злато.
Во ерата на дигиталната експанзија, NVIDIA ги продава „лопатите“ со кои технолошките гиганти копаат по новите иновации – и го прави тоа подобро од кој било друг.
