Претседателот на ентитетот Република Српска, Милорад Додик, изјави дека 300 припадници на унгарската специјална полиција пристигнале во Босна и Херцеговина оваа недела.
Според него, тие се сместени во објектите на МВР на РС во Бања Лука.
„Морам да ве информирам дека сум горд. Договорив со премиерот Орбан нивната антитерористичка единица, 300 луѓе, да дојде во РС и заедно со Специјалната антитерористичка единица на МВР на РС да одржат обука и вежби“, изјави Додик синоќа за време на неговото обраќање во Народното собрание на РС.
Додик минатата недела се сретна со Виктор Орбан, а унгарскиот премиер изјави дека се надева дека „новите ветришта“ во меѓународната политика ќе ги запрат политичките напади врз претседателот на ентитетот Република Српска, Милорад Додик.
Истовремено, Додик го пофали Орбан, нарекувајќи го визионер.
По средбата, Орбан напиша објава на социјалната мрежа X дека Унгарија сака стабилност на Балканот и истакна дека Додик придонесува за тоа со борбата за стабилност и напредок на Република Српска, пренесува Klix.ba.
„Тој не треба да биде казнет за тоа“, изјави Орбан, алудирајќи на пресудата што денес ќе му биде изречена на претседателот на Република Српска.
Оваа вест доаѓа во пресрет на пресудата против Милорад Додик пред Судот на БиХ.
Додик е обвинет за непочитување на одлуките на Високиот претставник и Уставниот суд на БиХ. Тој претходно потврди дека нема да се појави на изрекувањето на пресудата во случајот против него и вршителот на должноста директор на Службен весник на РС, Милош Лукиќ.
Наместо тоа, најави дводневен митинг во Бања Лука, а претходно во неколку наврати зборуваше за „радикални потези“ во случај на осудителна пресуда, вклучувајќи враќање на оригиналниот Дејтон, повлекување од Дејтонскиот договор и потпишување договор за конфедерација со Србија.
