Министерот за надворешни работи и трговија, Тимчо Муцунски, оствари средба со амбасадорката на САД, Анџела Агелер, на која беше потврдена силната стратешка соработка меѓу двете земји. Разговорите беа фокусирани на зајакнување на демократските вредности, економскиот развој и регионалната безбедност – теми кои ја одразуваат континуираната посветеност кон стабилен и просперитетен Западен Балкан.
Министерот Муцунски ја истакна важноста на економската соработка, привлекувањето странски инвестиции и унапредувањето на трговските односи. Билатералните посети на високо ниво сведочат за продлабоченото партнерство и заедничките заложби за развој и стабилност во регионот.
Безбедносните предизвици беа исто така во фокусот на средбата, при што беше потенцирана важноста на соработката во зачувување на регионалната стабилност и градење на отпорност кон современите закани. Двете страни ја изразија својата подготвеност за продлабочување на односите и натамошна соработка во унапредувањето на заедничките цели.
