Едита Тахири, поранешната раководителка на преговарачкиот тим на Косово во дијалогот со Србија, предупреди дека можните промени на границите во Балканот би биле „добри за Албанците“, бидејќи, како што рече, „ќе ја обедини трагично поделената албанска нација“. Тахири на фејсбук напиша и дека „почнале шпекулациите за мировните преговори предводени од Трамп“. Ова го објави информативниот портал на албански јазик „Папараци“ од Приштина во својата информација со наслов „Едита Тахири зборува за политиките на Трамп: Ако се променат границите во Балканот, ќе биде добро за Албанците“. Инаку, оваа директна закана за територијалниот интегритет и на Република Македонија е соодветно сериозна, бидејќи ја упатува Едита Тахири, високопозиционирана и влијателна политичарка од Косово, поранешен вицепремиер и министер за надворешни работи на Косово, со пообемно досие на меѓународни активности и контакти.
Натаму порталот пишува: „Шпекулациите на заруските и засрпските аналитичари ја афирмираат идејата за промена на границите, вклучително и на Балканот, поточно меѓу Косово и Србија.“ – наведе Тахири. Сепак, таа додава дека „дека американскиот претседател знае многу добро, оти нема да има промена на границите само на еден дел од Балканот, туку дека тие ќе се менуваат во целиот Балкан, преку мир или војна“.
Според Едита Тахири, „менувањето на границите е добро за Албанците“, бидејќи „тоа би довело до обединување на веќе трагично поделената албанска нација“.
