Венс: Постои голема шанса за одличен трговски договор меѓу САД и Велика Британија

Потпретседателот на САД, Џеј Ди Венс, изјави дека постои „голема шанса“ за постигнување „одличен трговски договор“ меѓу САД и Велика Британија, потенцирајќи ја, како што рече, „љубовта“ на американскиот претседател Доналд Трамп кон таа земја и британското кралско семејство.

Како што пренесе „Ројтерс“, Велика Британија засега е „поштедена“ од најстрогите царини предвидени во почетниот трговски план на Трамп, главно поради тоа што трговската размена меѓу двете земји е релативно балансирана.

Сепак, британскиот извоз во САД моментално се соочува со царина од 10 проценти, додека челичниот и автомобилскиот сектор подлежат на повисоки стапки од 25 отсто.

Венс изјави дека Трамп „навистина ја сака Велика Британија“, нагласувајќи дека има голема почит и љубов кон британската кралица и кон актуелниот крал.

„Тој има длабоки врски со Велика Британија, не само политички, туку и деловни. Како бизнисмен, Трамп има направено значајни инвестиции и имал бројни обврски во Велика Британија“, додаде Венс.

Во контекст на културните врски меѓу двете нации, потпретседателот нагласи дека верува оти постои реална можност за договор што ќе биде од заеднички интерес и корист за двете страни.

Путин испраќа нова порака до Европа: Парадата за 9 Мај како демонстрација на вистинска борбена сила

Нова видео-снимка од генералната проба за Парадата на Победата во рускиот град Екатеринбург предизвика загриженост кај западните набљудувачи. Наместо вообичаена демонстрација на претерана моќ и симболи од минатото, Русија годинава презентира ефикасна, подготвена и функционална воена постава, што аналитичарите ја толкуваат како потенцијален сигнал за конкретни офанзивни намери.

Проба пред Парадата со порака: Подготвени за фронтот

Снимката која почна да кружи на социјалните мрежи на 14 април, иако според првични информации е направена на 9 април, го прикажува она што се претпоставува дека ќе биде составот на воената парада за 9 Мај – Денот на Победата над нацизмот.

За разлика од претходните години, не беа прикажани супер-тенковите „Армата“ и „Терминатор“, ниту спектакуларните нуклеарни ракети или симболите од Втората светска војна. Наместо тоа, на улиците на Екатеринбург беа изложени реални, борбено способни единици, оптимизирани за современи услови.

Одбранбена технологија прилагодена за модерно бојно поле

Според извештајот на германскиот весник „Билд“, Русија во парадата прикажала:

Шест тенкови адаптирани за борба против дронови, опремени со заштитни кафези, мрежи и гумени валјаци

Класични ракетни системи BM-21 и BM-30 – кои го отсликуваат рускиот воен пристап „квантитет пред квалитет“

Борбени возила на пешадијата, опремени со електронски системи за заштита од дронови-камикази

„Парада што може веднаш да тргне кон фронт“

„Путин сака на оваа парада да прикаже искусна, подготвена и борбено способна војска – армија што би можела веднаш од парадата да тргне кон Украина или Балтикот“, изјави за Билд Нико Ланге, експерт за безбедност.

За него, ако Путин навистина изведе војска што е борбено оперативна, тоа претставува застрашувачки пресврт во начинот на комуникација од страна на Кремљ.

Логистика што зборува гласно

Најневообичаениот дел од парадата дојде при самиот крај: возила за поставување мостови, горивни цистерни, медицински возила, роботи за разминирање и системи за електронско војување. Тоа, според аналитичарите, е комплетна логистичка поддршка за евентуален напад на соседна земја.

Нова доктрина: помалку пропаганда, повеќе ефикасност

Според набљудувачите, Русија испраќа јасна порака – го напушта претераниот пропаганден пристап, а во преден план ја става прагматичноста, подготвеноста и продуктивноста на домашната воена индустрија.

„Ова повеќе не е шоу, туку реална демонстрација на технолошка и логистичка подготвеност – нешто што ѝ овозможува на руската армија да напредува на боиштето во Украина“, стои во оценката на западните извори.

Погледнете го видеото во продолжение:

Victory Parade Rehearsals in Yekaterinburg, featuring the latest modifications of T-72B3M, T-80BVM, T-90M with all the bells and whistles.
Along with other equipment, like a 100mm MT-12 Field gun, 152mm 2A36 Giatsint-B, 120mm 2S23 Nona-SVK, BM-30 Smerch, and alot of other… pic.twitter.com/WmxHQ9xBd0

— T-90K (@T_90AK) April 14, 2025

Украина и САД на чекор до договор за минерали: Ќе се потпише меморандум во блиска иднина

Украина и Соединетите Американски Држави постигнаа значителен напредок во преговорите за билатерален договор поврзан со минералите, а наскоро се очекува потпишување на меморандум кој ќе го означи првиот конкретен чекор во соработката, изјави украинската вицепремиерка Јулија Свириденко.

Овој договор, кој е дел од пошироката стратегија на американскиот претседател Доналд Трамп за изнаоѓање начин за стабилизирање на ситуацијата и забрзување на крајот на војната во Украина, треба да послужи и како механизам за враќање на дел од милијардите долари што САД досега ги имаат потрошено во форма на воена помош.

Претседателот Зеленски, од своја страна, веќе изјави дека Украина нема намера да ја третира помошта од претходната американска администрација како заем.

„Техничките тимови од двете страни работеа внимателно и веќе се усогласија неколку важни точки во нацрт-договорот“, напиша Свириденко на социјалната мрежа Икс. Таа нагласи дека правните експерти на Украина веќе адаптирале неколку клучни ставки, а процесот продолжува со добра динамика.

Според најавите, предложениот меморандум ќе отвори пат за формализирање на економската соработка, а како што дознава „Блумберг њуз“, САД ја ревидирале проценката на трошоците за украинската помош – од првично проектирани 300 милијарди на околу 100 милијарди долари.

Во фокусот на новиот договор, предложен од администрацијата на Трамп минатиот месец, се наоѓа идејата за заеднички инвестициски фонд. Приходите од експлоатација на минералните ресурси – било од страна на државни или приватни компании – ќе треба да бидат реинвестирани во овој фонд. Договорот не предвидува конкретни безбедносни гаранции за Украина, но се очекува да придонесе за долгорочен економски раст.

Свириденко најави дека договорот, откако ќе биде финализиран, ќе треба да биде ратификуван од украинскиот парламент. „Тоа ќе отвори нови можности за инвестиции и развој во Украина, а истовремено ќе придонесе и за создавање на услови за опиплив економски напредок во двете земји“, истакна таа.