Република

Времен сообраќај на Башиноселскиот мост кај Велес

Од денес, во 10:00 часот, беше пуштен за времен сообраќај мостот на реката Вардар кај Башино Село. Сообраќајот ќе се регулира преку светлосна сигнализација и семафори, а сообраќајот ќе се движи само по средишната лента на мостот. Оваа одлука ја донесе Јавното претпријатие за државни патишта (ЈПДП), додека не започнат работите за зајакнување на конструкцијата на коловозот на мостот.

Во петокот, ЈПДП доби дозвола од Министерството за внатрешни работи за воведување на новиот сообраќаен режим. Во соопштението што беше испратено до медиумите, се наведува дека новиот времен режим на сообраќај ќе биде активен 24 часа по објавувањето.

„Во согласност со Одобрението за времената промена на сообраќајниот режим за време на санацијата на мостот на реката Вардар на регионалниот пат Р1312, делницата Башино Село – Велес, воведуваме времен режим. Сообраќајот ќе се движи по една лента по средината на мостот и ќе се регулира со светлосна сигнализација, како дел од изготвениот сообраќаен проект и поставувањето на соодветната сигнализација и опрема“, се наведува во соопштението на ЈПДП.

Мостот беше затворен за сообраќај од 3 јануари оваа година поради сериозни проблеми со конструкцијата, вклучувајќи напукнувања на цевките и оштетувања на носечките греди. Премиерот Христијан Мицкоски и градоначалникот на Велес, Марко Колев, ја соопштија забраната, при што Мицкоски најави поправка на постојниот мост и изградба на нов мост 50 метри подолу.

Република

„Шпанец“ се враќа на пругите: Модернизиран и подготвен за патници

Легендарниот воз „Шпанец“, некогаш заборавен и речиси отпишан, се враќа на пругите со целосно нов лик. Денес беше тестирана обновената верзија на возот, кој сега располага со модерен дизајн, телевизори, озвучување, алармни системи и видео надзор.

Одговорните најавуваат дека подготовките за поудобно и побезбедно патување се во полн ек, со цел патниците да уживаат во современо и безбедно патување.

Следуваат уште новости за враќањето на овој легендарен воз – останете со нас за сите детали.

Видеото може да го погледнете тука

Република

После многу години конечно Тетово ќе се украсува

На онлајн седница одржана денеска, 12 декември 2025 година, Советот на Општина Тетово со мнозинство гласови донесе одлука за украсување на градот за претстојните новогодишни празници.

„За оваа програма „за“ гласаше советничкото мнозинство составено од Коалицијата „Вреди“ и ВМРО-ДПМНЕ, додека против беа советниците од коалицијата НАИ. Воздржани беа од Подобро за Тетово, Левица и СДСМ. Со оваа одлука, Општина Тетово ја потврдува намерата градот да добие празничен сјај за крајот на 2025 година“, изјави претседателот на Советот, Јусуф Абдули.

Истовремено, изгласана е измена на Програмата за активности на Општина Тетово во областа на културата за 2025 година. Според новата програма, за празничното украсување се предвидени еден милион и петстотини илјади денари, што е над 24 илјади евра.

Република

Коњановски ги прими просветните работници на годината од Битола

Градоначалникот на Битола, Тони Коњановски, денеска оствари средба со добитничките на признанието „Просветен работник на годината“ за учебната 2024/2025 година – Наташа Тодоровска, наставник по одделенска настава во ОУ „Ѓорѓи Сугарев“, и Аница Б. Златевска, психолог во ОУ „Коле Канински“.

Коњановски им честиташе за значајното признание доделено од Министерството за образование и наука и Сојузот на просветни работници, нагласувајќи дека ваквите награди се симбол на поширока општествена заложба за почит и вреднување на улогата на наставниците, воспитувачите и стручните соработници во образованието.

Тој истакна дека трудот на просветните работници е фундаментален за формирањето на идните генерации и дека локалната самоуправа ќе продолжи да ја поддржува нивната работа.

Признанијата се доделуваат во рамките на кампањата „Магијата е во знаењето“, која Министерството ја реализира по повод 5 Октомври – Светскиот ден на учителите, со цел истакнување на незаменливата улога на учителите и зголемување на општествената почит кон нив.