Кина објави дека направила значаен напредок во потрагата по одржливи извори на енергија со откритие кое може да го промени глобалниот енергетски пејсаж.
Во рударскиот комплекс Бајан Обо, едно од најважните наоѓалишта на ретки минерали во светот, геолозите откриле големи резерви на ториум – радиоактивен елемент кој, според експертите, може да ги задоволи енергетските потреби на Кина за следните 60.000 години. Со откритие од милион тони ториум, многумина го гледаат ова како пресвртница во развојот на нуклеарната технологија и преминот кон чиста енергија.
Овој напредок доаѓа во време кога Кина активно бара нови извори на енергија за да ја намали зависноста од јаглен, да го стабилизира снабдувањето и да ги намали емисиите на стакленички гасови.
Со оглед на тоа што ториумот се наоѓа на дури 234 локации низ Кина, Пекинг веќе вложува напори во развојот на технологии што ќе ја направат основата за идни нуклеарни централи.
Ториумот е природно радиоактивен елемент кој се наоѓа во значително поголеми количини отколку ураниумот. Иако научниците го разгледуваат како потенцијална замена за ураниум во нуклеарните реактори веќе децении, сериозни инвестиции во технологиите кои можат да го искористат се започнати само во последниве години. Главната предност на ториумот е неговиот огромен енергетски потенцијал – проценките сугерираат дека ториумот може да произведе до 500 пати повеќе енергија отколку ураниум-232, кој се користи во традиционалните нуклеарни реактори.
Ториумските реактори произведуваат помалку радиоактивен отпад, се побезбедни, стабилни и имаат помал ризик од топење на јадрото. Плус, отпадот што се создава при распаѓањето на ториумот е радиоактивен за многу пократок период, што значително ја олеснува задачата за складирање на нуклеарниот отпад.
За разлика од ураниумот, ториумот не може лесно да се искористи за производство на нуклеарно оружје, што го прави поприфатлив и од безбедносен аспект. Покрај тоа, ториумот е пообилен, поевтин за екстракција и има наоѓалишта кои се подеднакво распоредени низ светот.
Во Европа, иако наоѓалиштата на ториум се помали во споредба со оние во Азија и Австралија, значителни резерви се откриени во Норвешка, Финска, Шведска, Франција и Португалија. Во Европа, ториумот најчесто се наоѓа во форма на моназитни песоци, кои често се придружени со руди од ретки земји и титаниум. Норвешка е особено интересна бидејќи нејзините наоѓалишта се поврзани со големи резерви на ретки минерали во јужниот дел на земјата.
Иако Европа во моментот нема големи проекти за развој на реактори базирани на ториум како Кина, интересот за овој елемент расте, бидејќи нуди можност за користење на домашни ресурси и сигурно снабдување со енергија, без зависност од увоз на ураниум или фосилни горива.
