Првите партиски функционери од ДУИ синхронизирано ги најавуваат следните потези. Политичките опоненти им возвраќаат – вие немате кредибилитет, има кој да се грижи за правата на Албанците.
Пред два дена, лидерот на ДУИ, Али Ахмети, изнесе сериозни закани предупредувајќи дека нема да има локални избори ако Владата се обиде да го менува или воопшто ако го допре Законот за јазиците.
Потпретседателот Османи вчера во гостување на ТВ21 ја повтори неговата порака и најави длабока политичка криза.
Биљал Касами од коалицијата Вреди денеска им одговори и на двајцата.
Мора тие да расчистат со злоупотреба на позициите кои ги имале 20 години од нивните функционери за да после кажуваат прикаски во делот на заштитата на правата на Албанците. Али Ахмети треба да внимава на следен обид за дестабилизација да не се допрат членовите на неговата фамилија за кои има информации и информации дека противзаконски се збогатиле, ја користеле неговата функција на власт дваесет години за противзаконски да се збогатат, вели Биљал Касами од коалицијата Вреди.
И Социјалдемократскиот сојуз кој до неодамна беше коалициски партнер на ДУИ во Владата, сега ја критикува позицијата на интегративците. Заменик-претседателката на СДСМ, Сања Лукаревска, вчера кажа дека ДУИ мора да се помири со фактот дека се во опозиција и дека треба да делуваат како опозициска партија, затоа што во моментов не се во состојба да поставуваат услови.
Од ВМРО-ДПМНЕ им порачаа на ДУИ дека за 20 години имале можност многу да направат и веќе не се никаков фактор во државата.
Темата за Законот за употреба на јазиците повторно стана актуелна во пресрет на подготвителната седница на Уставниот суд, која според најавите треба да се одржи во втората половина на март. Се чека советот на Венецијанската комисија за неколку спорни членови од законот.
